Túrkistannyń týmasy, jazýshy, kósemsózshi, ádebıet synshysy Igilik Áımenniń jaǵdaıy qıyn eken. Ol kisi búginde Astanadaǵy «Kóktaldan» páter jaldap turyp jatyr. Ózi ekinshi toptaǵy múgedek. Az ǵana zeınetaqysyn páter jaldaý men emdelýge ázer jetkizip, keıde aptalap qara nandy ǵana talǵajaý etetin kúnderi bolady dep habarlaıdy baq.kz

– Igilik aǵa, jaǵdaıyńyzdy estigen soń habarlasyp turǵan edik, qazir halińiz qalaı?

– Jaǵdaıdyń nesin suraısyń, qaraǵym, kezinde jaqsy ómir súrip edik, endigi tirshilik mynaý. Áıelim osydan jeti jyl buryn qaıtys bolǵan. Jalǵyz uldy enesi men kúıeýden qaıtyp kelgen qaıynbıkesi ortalap, óıtip-búıtip júrip úıine kirgizip aldy. Aýyldaǵy úıdi satyp, 25 myń dollar bankke quıyp, ıpotekaǵa alǵan úsh bólmeli úı bar edi, aqshasyn jalǵyz ózim tólep tura almaǵan soń prosenti ósip, ony da bank tartyp aldy. Endi «Kóktalda» páter jaldap turyp jatyrmyn.

– Úıińiz jyly ma?

– Úı dep qaı bir úı deısiń, páter qojaıyndary kómir bermeıdi, syǵyraıǵan elektr peshiniń jylýymen otyrmyz. Qazir kún jyly bolyp tur. Erteń sýytyp ketse ne bolatynyn bilmeımin. Jıi-jıi aýyryp qalamyn. Ótken aqpan aıynda qulap qalyp, eki omyrtqamdy zaqymdap alǵan edim. Odan tolyqtaı aıyǵa almaı júrgende kitaphanadan shyǵyp kele jatyp qulap, basymdy jaryp aldym. Qan qysymy da túspeı tur. Biraq Qudaıǵa aıtar aryzym joq. Tańerteń Ulttyq kitaphanaǵa baryp, kompúter zalynda sharshaǵanymsha otyryp jumys isteımin. Sodan soń úıge kelip shaı-paı ishken bolamyn.

– Qazirgi halińiz shyǵarmashylyǵyńyzǵa da keri áserin tıgizip jatqan shyǵar. Ulttyq kitaphanada bolǵanda birdeńe jaza alyp jatyrsyz ba?

– Jazyp júrgen eńbegim bar edi. Noýtbýgymdy avtobýsta umytyp qaldyryp ketippin. Sol úshin ǵoı kitaphanaǵa baryp júrgenim. Byltyr kóktemde memlekettik tapsyryspen «Máńgilik mahabbatym meniń» degen prozalyq jınaǵymdy shyǵaryp berdi.

– Oǵan qalamaqy berilmeı me?

– Eshteńe de bergen joq. Jalǵyz men emes qoı, bárine de berilmeıtin bolǵan qazir. Qalamaqyńyz dep 100 kitap berdi. Ony men kóshege shyǵyp satyp júreıin be? Tanys-tamyrlarǵa taratyp berdim.

– Qansha balańyz bar? Birde-bireýi qaraılaspaı ma?

– Ulym habarlasyp, jaǵdaıymdy surap turady. Biraq áıelinen asyp kete almaıdy. Al eki qyzym múldem habar almaıdy. Olardyń da óz tirshiligi bar. Áıelim kezinde jıyrma jyl mektep dırektory bolyp istep, jurt qatarly jap-jaqsy-aq kún keshken edik, aqyry mynaý boldy.