Májilismen Muhtar Tinikeev týraly daýly vıdeonyń túsirilgen ýaqyty belgili boldy, - dep habarlaıdy Tengrinews.kz.
Osyǵan deıin Tinikeev nv.kz basylymynyń tilshilerine bul rolıktiń eki jyl buryn túsirilgenin málimdegen bolatyn. "Bul eski vıdeo. Eki jyl buryn bolǵan. Bul ázil", - dep jaýap bergen edi tilshige depýtat.
Teledıdarda "Vestı" telearnasynyń Mýrmanskide túsirilgen sújeti kórsetiledi. Telearnanyń saıtynda bul sújet bıyl 17 jeltoqsanda jarıa bolǵan.
Reseılik telearnanyń saıtynda jarıalanǵan sújette reporterdiń shash úlgisi men kıimi daýly vıdeodaǵy sújette turǵan adamnyń shashy men kıimine uqsaıdy. Sondaı-aq, jańalyqta kórsetilgen kadrlar da Tinikeev túsirilgen vıdeodaǵy teledıdarda kórsetiledi. Soǵan qaraǵanda, Tinikeev túsirilgen vıdeodaǵy oqıǵa jeltoqsan aıynyń ortasynda túsirilgen. Álde reseılik telearna óziniń eski sújetin eki jyldan keıin jarıalaýdy uıǵarǵan.
Eske salaıyq, 20 jeltoqsanda WhatsApp Parlamenttiń tómengi palatasynyń depýtaty Muhtar Tinikeevke uqsaıtyn adam kórsetilgen birneshe vıdeo tarady. Kadrlardan oqıǵanyń dastarhan basynda bolǵanyn kórýge bolady. Eki er adam turyp alyp, janjaldasyp jatady. Májilismen Muhtar Tinikeevke daýsy da, ózi de uqsaıtyn adam taǵy eki er adamnyń kózinshe bireýden jaýap alady. Depýtatqa uqsaıtyn er adam áńgimelesýshisine bylapyt sóz aıtyp, soqqy jasaıdy.
Qazirgi ýaqytta QR Parlamentiniń tómengi palatasynyń depýtaty Muhtar Tinikeev paıda bolǵan vıdeoǵa qatysty pikir bildirmedi. Tengrinews.kz tilshisimen áleýmettik jelide baılanysqan ol vıdeonyń eki jyl burynǵy ekenin ǵana atap ótti.
2016 jyldyń sáýirinde Muhtar Tinikeev "kompúterdiń arǵy betinde tyǵylyp otyratyn ınternet shvarsneggerlerimen sóılespeýge tyrysatynyn" jáne boksshy Gennadıı Golovkınnyń jankúıeri ekenin aıtqan bolatyn.
