Qazaqstan dıplomattary koreıalyq jumys berýshini sol elde qaıtys bolǵan otandasymyzdyń týystaryna ótemaqy tóleýge májbúr etti dep habarlaıdy 24.kz.

Qarajat jaqyn arada Almatyda turǵan marqumnyń otbasynyń shotyna aýdarylady. Sondaı-aq Seýldegi Qazaqstan elshiligi jumys berýshiniń zańsyz eńbek etken qyzmetkerge ótemaqy tóleýi óte sırek bolatyn jaǵdaı ekendiginen habardar etti.

 Qazaqstan azamaty Keńes Shúkirbaev Seýlden 120 shaqyrym jerde ornalasqan Sosan qalasynda jumys istegen. Ol Koreıaǵa bir aıǵa saıahattap kelip, keıin jumys isteýge qalǵan eken. Myna sýret Keńestiń qaıtys bolǵan kúni túsirilipti. Ol jalǵyz turǵan. Dostarynyń aıtýynsha, marqum shetelde jumys istegen 4 aıdyń ishinde jıyrma kelige aryqtaǵan. Aqshasyn únemdep, Almatydaǵy otbasyna kóbirek jiberip otyrǵan. Aıaqasty ólimge jarytyp tamaq ishpeýi de sebep bolýy múmkin. Onyń ústine Koreıanyń jazy da ystyq.

Shúkirbaeva Meıramkúl, Keńes Shúkirbaevtyń jesiri «Qasymyzda júrse, múmkin basqasha bolar ma edi?! Ol jerge barǵannan keıin saǵynysh boldy ma?! Áıteýir júregi birden toqtady.

Erjan Amýrtaev, QR elshiliginiń Koreıa Respýblıkasyndaǵy birinshi hatshysy: «Qazaqstan elshiliginiń resmı sharalary, sonyń ishinde Koreıa polısıasynan, densaýlyq saqtaý organdarynan alynǵan qujattar negizinde azamatymyzdyń ólimine densaýlyǵynyń nasharlaýy sebep bolǵany anyqtaldy. Aýyr jaǵdaıda jumys istegennen onyń júregi qıyndyqty kótere almaǵan. Koreıada jumystyń las, qaýipti jáne aýyr túri bar. Ádette Koreıa Respýblıkasynyń azamattary mundaı jumystardyń birin de istemeıdi».

Keńes qurylysta júrip júrgizýshi de boldy. Tas ta qalady. Júk te tasydy. Túski úziliste ózin jaısyz sezinip, dostary jedel járdem shaqyrǵan, biraq dárigerler kómektese almady. Jumys berýshi Keńestiń máıitin Almatyǵa jiberý shyǵyndaryn óz moınyna alyp, otbasyna tólemaqy óteýge kelisti.

Chong Syng Kú, qurylys kompanıanyń basshysy: «Men kómektesýge birden kelistim, sebebi meniń de ákem shetelde jumys istep júrip qaıtys bolǵan. Sol jaqta onyń máıitin órtep, bizge tek kúlin ákelip berdi. Bul oqıǵa bala kezimnen este qaldy. Sondyqtan týystar onymen oıdaǵydaı qoshtasqanyn qalap, azǵantaı aqsha jiberdim, sebebi otbasy asyraýshysynan aıyryldy ǵoı».

 Shúkirbaeva Meıramkúl, Keńes Shúkirbaevtyń jesiri: «Ushaqqa ushqanyń ózi 3,5 myń dollar dedi. Bálzamdaýy 7 myń dep aıtty. 35-40 myń ketti dep oılaımyz».

Keńes Shúkirbaevtyń artynda 3 balasy men 2 nemeresi qaldy.

Meıramkúl osy aýyr qazadan keıin týma-týys, jaqyndaryn shetelge jibergisi joq.