№157 orta mektep basshylyǵy «Uly dala balasy Tóreǵalı Tóreáli atyndaǵy májilis zaly» ashyldy degen aqparatty joqqa shyǵardy.

Esterińizge sala keteıik, budan buryn ózin Tóreǵalı Tóreáliniń dırektorymyn dep tanystyrǵan Farıza Spandıarova óziniń ınstagram paraqshasynda  «Búgin bizde taǵy bir qýanyshty jańalyq. Naýryzbaı aýdanyndaǵy, nómiri 157-shi mekteptiń ishinen Uly Dala balasy - Tóreǵalı Tóreáli atyndaǵy “Májilis zaly“ ashyldy. Endi mekteptiń barlyq is-sharalary osynda ótetin bolady» dep jazǵan edi. Osy jazbany kórgennen keıin «Qamshy» saıty  jazbanyń avtoryna habarlasty.

Farıza Spandıarova bizge bergen suhbatynda mektep basshylyǵyna oqýshylar «Tóreǵalı Tóreáli atyndaǵy májilis-zalyn» ashý týraly usynys tastaǵanyn aıtqan.  Mektep basshylyǵy qabyl alyp, onyń ashylý saltanatyna ánshini shaqyrǵan. Tóreǵalı usynysty qýana qabyl alyp, oqýshylarǵa án aıtyp bergenin aıtty.

Ánshiniń dırektory bizge májilis zalynyń ashylý saltanatynan dep Tóreǵalıdyń oqýshylarmen birge túsken jáne Tóreǵalıdyń «Uly dala balasy Tóreǵalı Tóreáli atyndaǵy májilis zaly» dep jazylǵan taqtaıshany ustap turǵan fotosy men vıdeony jiberdi. Ol qamshy.kz jarıalandy.

Naýryzbaı aýdanyndaǵy №157 mektepke habarlasqanymyzda, mektep dırektory Ahmetova Sveta Aǵabekqyzy atalmysh májilis-zaly joq ekenin jáne bolashaqta da ashylmaıtynyn aıtty.

«Tóreǵalıdyń prodúseri «Tóreǵalı Tóreáliniń atyndaǵy májilis zaldy ashý» týraly usynys jasady. Alaıda biz óz betimizben ondaı zal asha almaımyz. Ol úshin ákimshiliktiń, bilim basqarmasynyń ruqsaty kerek. Biz aty atalǵan mekemelerge ol usynysty jibergen de joqpyz. Sondyqtan «Uly dala balasy Tóreǵalı Tóreáli atyndaǵy májilis zaly» №157 mektepte ashylmady jáne bolmaıdy da. Al foto men vıdeoǵa qatysty aıtar bolsam, táýelsizdiktiń 25 jyldyǵyna oraı uıymdastyrylǵan merekelik is-sharaǵa Tóreǵalı qonaq retinde kelip ketken. Sol ýaqytta túsirilgen foto men vıdeo» dedi mektep dırektory.

qamshy.kz saıtynda ánshiniń atynda májilis zaly ashylǵany týraly aqparat shyqqanda oqyrmandar tarapynan mektep basshylyǵyna narazylyq bildirgender kóp boldy. Bilim ordasyndaǵy zalda ánshiniń emes ult zıalylarynyń esimderi berilýi kerek edi ǵoı dep renishterin bildirdi. «Qamshy.kz» portaly óz tarapynan jáne oqyrmandardyń tilegin №157 mektep basshylyǵyna jetkizdi. 

 №157 mektepte «Uly dala balasy Tóreǵalı Tóreáli atyndaǵy májilis zaly» ashylǵanyna qatysty keleńsizdik oryn alypty. Mektep dırektoryna  ártaraptan qysym kórsetilip jatyr eken. İs nasyrǵa shappaýy úshin «Qamshy» barsha oqyrmandardy sabyrlyqqa shaqyrady.