Jurttyń zeınetaqy qoryna quıǵan qarjysy taǵy mıllıardtap urlanǵan syńaıly! Quzyrly organdar men Ulttyq bank qyzmetkerleri birneshe kúnnen beri Biryńǵaı zeınetaqy jınaqtaý qoryn jiti tekserip jatyr dep habarlaıdy ktk.kz. Olar mekemeniń ózine tıesili aktıvterin qaıda salǵanyn anyqtamaq. Búgin Ulttyq bank resmı málimdeme jasap, tek qordyń aqshasyn sanap jatqandaryn aıtty. Al jeke azamattardyń quıǵan qarjysyna tekserýdiń esh qatysy joq dep sendirýde. Dese de, salymshylardyń 5 mıllıard teńgesi qoldy boldy degen de aqparat tarap jatyr.
Elimizde sońǵy aılarda zeınetaqy qorlary boıynsha ınvestısıalyq tabys aıtarlyqtaı tómendepti. Muny mamandar teńgeniń qunsyzdanýymen baılanystyrǵan. Alaıda, bar kiná valúta baǵamynda emes sekildi. Aqshanyń qaıda ketkenin endi quzyrly organdar anyqtaýy tıis. Olar Ulttyq bank ókilderimen qosylyp, úsh kúnnen beri Biryńǵaı zeınetaqy jınaqtaý qoryn tekserip jatyr.Tekseris negizinen zeınetaqy qorynda menshikti aktıvterdi ınvestısıalaýǵa qatysty jasalǵan operasıalar boıynsha júrgizilýde. Al, jaǵdaıdyń jeke azamattardyń jınaǵyna esh qatysy joq dep sendirýde Ulttyq banktegiler.
«Biryńǵaı jınaqtaýshy zeınetaqy qorynyń menshikti aktıvteri onyń kapıtaly jáne sharýashylyq qyzmetiniń nátıjeleri esebinen quralady. Qor menshikti aktıvterdi derbes basqarady. Al azamattardyń zeınetaqy jınaqtary "Biryńǵaı jınaqtaýshy zeınetaqy qorynyń" balansynan bólingen jáne bólek esepteledi.»
Negizi zeınetaqy qoryndaǵy qarjynyń qaıda quıylyp jatqanyn Ulttyq bank qadaǵalaýy tıis. Bas bank ókilderi jurtty jubatpaq bolǵanymen, keıbir aqparat quraldary zeınetaqy jınaqtarynyń ońdy-soldy shashylǵanyn aıtýda. Iaǵnı, qordan 5 mıllıard teńge qoldy bolǵan kórinedi. Qarjy altyn ıgeretin jeke kompanıaǵa ınvestısıalaý arqyly jymqyrylǵan degen aqparat tarap jatyr. Eger bul dáleldense halyqtyń aqshasyn qaltasyna basqandardy jappaı jazalaý kerek deıdi depýtattar.
Shavhat Ótemisov, Májilis depýtaty:
-Tekserý kerek. Ol degen adamdardyń bolashaǵyn oılap salyp qoıǵan aqshalary. Olar birinshiden tıimdi paıdalaný kerek. Olar saqtanýy kerek. Zań buzýshylyqqa jol berilmeýi kerek.
Zeınetaqy qorynyń basshylyǵy urlanǵan aqsha týraly aqparatty joqqa shyǵardy. Ázirge quqyq qorǵaýshylar da mundaǵy tekseriske qatysty jaq ashyp eshteńe aıtpaı otyr. Al, Ulttyq bank tek tintý bitkennen keıin resmı túrde málimdeme jasamaq.
