Bishkek qalasynan Nazarbek Baıjigitov esimdi azamat Shymkenttiń «Zamana» gazetine osyndaı oı bildiripti. Maqalanyń tolyq mazmuny mynandaı:

«Qyrǵyz Parlamenti «Qyrǵyz Respýblıkasynyń Ákimshilik jaýapkershilik týraly Kodeksine ózgerister engizý týraly» Zań jobasyn eki ret talqylaýdan ótkizdi, úshinshi oqýda daýys berýge ázirleýde.

Bul zań jobasy qyrǵyz qoǵamynda ár túrli pikirlerdi týyndatýda. Qabyldanýǵa shaq qalǵan jańa Kodekste burynǵysyna birqatar ózgeristerdi engizýmen qatar zań buzýshylarǵa beriletin jaza qataıtylyp, tólenetin aıyppul mólsheri kóterilgen.

Mysaly, buryn usaq tártip buzýshylyqtar, arnaıy belgilenbegen jerlerde ishimdik ishý, kóshede mas bolyp júrý boıynsha aıyppul 100 somnan 300 somǵa deıin, quqyq buzǵan balalary úshin ata-analary 100 somnan 200 somǵa deıin, kámeletke jetpegen balalardy ádepsiz iske tartqandarǵa 1000 somnan 2000 somǵa deıin bolsa, endi aıyppuldar  on esege kóteriletin bolady, sondaı-aq tártip buzýshy segiz saǵatqa qamalady nemese birneshe kúnge qara jumysqa jegiledi.

«Usaq tártipsizdik» babynda qoǵamdyq oryndarda bylapyt sóıleý, bireýlerdi anaıy sózdermen balaǵattaý da bar. Jalpy, Kodekske ózgerister engizýge negizinen qoǵamdyq oryndarda, kóshede, kólikterde jastardyń ádepsiz sóıleýi etek alyp bara jat­qany sebep bolýda.

Osy oraıda ózim Ońtústik Qazaqstan oblysynyń týmasy bolǵandyqtan bul ózi qaı jerde bolsa da kerek zań eken degen oıǵa qaldym. Ǵalamtordan Qazaqstannyń zańnamalaryna kóz júgirtsem, bul sıaqty zańnama – «Ákimshilik quqyq buzýshylyq týraly» Qazaqstan Respýblıkasynyń Kodeksi 2014-jyldyń 5-shildesinde qabyldanypty. Osy Kodekstiń «Usaq buzaqylyq» dep atalǵan 434-babynyń 1-bóliginde «Usaq buzaqylyq, ıaǵnı qoǵamdyq oryndarda bylapyt sóıleý jáne basqa da osyndaı áreketter on aılyq eseptik kórsetkish mólsherinde aıyppul salýǵa ne on táýlikke deıingi merzimge ákimshilik qamaqqa alýǵa ákep soǵady» dep jazylypty.  On aılyq eseptik kórsetkish 2016-jyldyń 1 qańtarynan bastap 21 myń 210 teńge degen sóz. Eger buzaqylyq qaıtalansa, jaza ne aıyppul ulǵaıa túsedi eken.

Menińshe, Shymkentte jáne oblysta «shesheń...» dep júrgenderdi shetinen qamap, tártipke salatyn mezgil jetken sıaqty»