Keshe, áleýmettik jelide Álem chempıony Qýat Naımannyń instagtam paraqshasynda «ýaqytsha tirkeý» máselesin synaǵan jazbasy qatty talqylandy. Ol jazbasynda QR azamattaryn tirkeý týraly erejege óz narazylyǵyn bildirip, elimizdegi jumyssyzdyq, qysqartýlar, qymbatshylyqty qatań synǵa alǵan edi. Oǵan oraı qoǵamda Qýat Naımanǵa alqaýlar jaýyp jatty. Oqyrman nazaryna belgili saıasatker Jasaral Qýanyshalınnyń «Jaraısyń Qýat» atty jazbasyn usynamyz.

Osy ýaqytqa deıin Qazaqstannyń ataqty sportshylary, ókinishke oraı, olarǵa bılik ne iste dese, sony isteıtin ezder ekenin kórsetip kelse, ınshalla, búgin olardyń arasynda da shyn máninde ER JİGİT, ERKEK ataǵyna laıyq AZAMAT bar ekenin kórip, kóńilim bir marqaıyp qaldy! 
Ol Azamat - bizdiń elimizde halyq múddesiniń aıaq astyna aıaýsyz taptalyp jatqanyn ashyq aıtqan jáne dıktatorlyq bıliktiń sol halyqty tyrp etkizbeı buǵalyqtap ustap otyrý úshin jańadan oılap tapqan soraqy ozbyrlyǵy - barshamyzdy jappaı tirkeýden ótýge májbúrleıtin jabaıy talabyna shamyrqana qarsy shyqqan erejesiz jekpe-jektiń tanymal jaýyngeri QÝAT (NAIMAN) HAMITOV. 
Jaraısyń, aınalaıyn Qýat! Osy betińnen taıma! Alla Taǵala aldyńnan jarylqasyn! Áýmın!