Búgin BAQ ókilderi Rıo-de-Janeıro Olımpıadasynyń chempıony Danıar Eleýsinovtiń resmı túrde kásipqoı boksqa aýysqanyn jarysa jazyp jatyr. Osyǵan oraı taralǵan aqparattyń anyq-qanyǵyn bilý maqsatynda bokstan Qazaqstan ulttyq quramasynyń bas bapkeri Myrzaǵalı Aıtjanovqa qońyraý shalyp, mán-jaıdi suradyq, dep habarlaıdy Qazaqparat.
- Myrzaǵalı Qulanuly, tól shákirtińiz Olımpıada chempıony Danıar Eleýsinovtiń kásipqoı boksqa aýysyp jatqany qanshalyqty shyndyqqa janasady?
- Iá, ondaı sóz shyqsa, tegin emes. Bul shyndyq. Ol kásipqoı boksqa ketip jatyr.
- Siz onyń kásipqoı boksqa aýysýyna qalaı qaraısyz?
- Kim bolsa da, bireýdiń baǵyn baılaı almaıdy. Eger aldyna belgili bir naqty maqsat qoıyp, sonyń jolynda bar kúsh-jigerin salyp jatsa, nege qoldamasqa? Ol jaqynda maǵan arnaıy qońyraý shalyp, amerıkalyq promoýterlerden usynys túsip jatqanyn, olarmen kelisimshartqa otyrýǵa daıyn ekenin aıtyp, aldaǵy josparlarymen bólisti. Men onyń oılarymen kelisip, aq jol tiledim. Biz onyń usynysyn komanda bolyp qoldadyq. Endi ol Gennadıı Golovkın sıaqty qazaqtyń týyn kásipqoı boksta jelbiretedi.
- Danıar áýesqoı boksta júrip, endi bir Olımpıadaǵa qatysý múmkindigi bar edi...
- Iá, áýesqoıda júrse taǵy bir Olımpıadaǵa barýǵa tolyqqandy múmkindigi bar. Alaıda ol bokstan áýesqoıda qandaı deńgeıdegi jarystar bolsa, sonyń barlyǵyn baǵyndyryp bolǵan sportshy. Azıa birinshiligin, Álem chempıonatyn, ózge de kóptegen halyqaralyq jarystardy, ótken jyly ǵana jarystyń tóresi sanalatyn Olımpıada altynyn da qanjyǵasyna baılady. Endi ol ózge qyrynan tanylyp, kásipqoı rıngte baǵyn synamaq.
- Endi 69 keli salmaqta kimge úmit artamyz?
- Bizdiń mindetimiz - shákirt tárbıeleý. 69 keli «qazaqtyń altyn salmaǵy» ekenin bilesizder. Danıar ketkenimen bul salmaqtyń orny bosap qalmaıdy. Onyń ornyna jańa sportshylar keledi. Buıyrsa, kelesi Olımpıadada bul salmaqtan jańa chempıon shyǵaratyn bolamyz. Danıar ketse, artyndaǵy jastarǵa jol ashylǵaly tur. Bolashaqta Danıar sıaqty jańa esimder, jańa juldyzdar shyǵady áli.
- Qazir ulttyq qurama oqý-jattyǵý jumystaryn bastady ma?
- Iá, oqý-jattyǵýdy bastap kettik. Almatydaǵy boks akademıasynda Ulttyq qurama bapkerleri men «Astana arlandarynyń» bapkerleri birge, jalpy 52 boksshyny jattyqtyryp jatyrmyz.
- Alda qandaı jarystar bolady?
- Aqpan aıynda alǵashqy týrnır ótedi. Ol Vengrıa elindegi «Ishtvan Boskaı» memorıaly. Al naýryzda eki birdeı halyqaralyq týrnırge qatysamyz. Olar Germanıada jáne Fınlándıada ótedi. Basqa da túrli dodalar bar. Basty maqsat - Azıa chempıonatyna tyńǵylyqty daıyndalý. Aqpan aıynda boksshylarymyz AQSH jáne Germanıa elderimen birikken oqý-jattyǵý jumystaryn jasaıdy. Al naýryz aıynda Germanıa eline baryp, Galle qalasynda ótetin týrnırge qatysady.
– Áńgimeńizge rahmet!
