9 jasar kishkentaı qyz óte úlken júrek pen meıirimniń ıesi AQSH-tyń Sıetl qalasynda turǵan.

Bir kúni Sıetlge «Sharity: water» qaıyrymdylyq uıymynyń basshysy Skott Harrıson keledi. Ol leksıasynda álemdegi kedeı memleketterinde aýyz sýdyń tapshylyǵynan adamdar qalaı zardap shegetinin, onyń uıymy taza sýdyń jetispeýshiligimen kúresetinin aıtyp beredi. Zaldyń bir buryshynda tyńdap otyrǵan qyz adamdardyń shalshyq pen batpaqtan las sýdy ishetinin, sonyń saldarynan túrli ınfeksıa juqtyryp alatynyn birinshi ret kórip, tańǵalady. Ol tek osy sýdyń saldarynan kún saıyn 4500 bala qaıtys bolatynyn estıdi. Reıchel olardy qutqarýǵa sheshim qabyldaıdy.

Reıchel ata-anasynyń kómegimen «Sharity: water» qorynyń resmı saıtynda óziniń paraqshasyn ashady. Jáne 9-shy týǵan kúnine ózin tanıtyn dostaryna, tanystaryna syılyqtyń ornyna balalardy qutqarý úshin aqsha aýdarýdy ótinedi. 15 adam taza sýǵa qol jetkizý úshin oǵan 300 dollar jınaý kerek bolady. Biraq jınalǵan aqsha tek 11 adamnyń ómirin qutqarýǵa ǵana jetedi. Onyń kóńili qatty túsip ketedi. Týǵan kúni ótken soń onyń paraqshasyn jaýyp tastaıdy.

Birneshe apta ótkennen keıin Amerıkada jan túrshigerlik oqıǵa oryn alady. Sıetldegi tas jolda 20 kólik soqtyǵysady. Onyń birinde Reıchel otbasymen bolady. Bul apatta ondaǵan adamdar tiri qalady, keıbiri jeńil jaraqat alady, alaıda birneshe jerden omyrtqasy synǵan Reıchel ǵana jan saqtaý bólimine túsedi. Dárigerler qyzdy aman alyp qalý úshin bárin istese de, Reıchel esin jımastan qaıtys bolyp ketedi.

Leksıany júrgizgen Skott Harrıs qaıǵyly oqıǵany estip, Reıcheldiń sońǵy ótinishi bolǵan paraqshasyn qaıtadan ashady. Ol ony kúnde baqylap otyrady. Qoǵamnyń nazaryn aýdarǵan oqıǵadan soń, aýdarylǵan aqshanyń sany arta bastaıdy.  

Reıcheldiń qaıyrymdy áreketteri men qasiretti taǵdyry amerıkalyq qoǵamda úlken rezonans týǵyzdy. Álemniń túkpir-túkpirinen  31 997 adam 1 265 823 dollar aýdarǵany belgili boldy. Jınalǵan aqshaǵa kóptegen afrıkalyq óńirlerge sý júrgizýge bolady jáne 60 000 adamnyń ómirin qutqarýǵa bolady. 300 dollar jınaǵysy kelgen kishkentaı qyzdyń armany 40 ese artyǵymen oryndaldy.

Buǵan deıin de Reıchel qaıyrymdylyq ispen aınalysyp, eki ret shashyn ósirip, ony qyrqyp, onkologıalyq aýrýdyń saldarynan shashy túsip qalǵan balalarǵa jasandy shash retinde qoldanýǵa bergen eken. Al Reıcheldiń óliminen keıin de onyń aǵzalary muqtaj adamdarǵa berilip, birneshe adamnyń ómirin qutqaryp qalǵan.

Osylaısha kishkentaı ǵana qyzdyń áreketi men ólimi búkil adamzatqa neniń shyn máninde mańyzdy ekenin uǵyndyrǵandaı...