Daýǵa aınalǵan "Fenıks" fılminiń atqarýshy prodúseri - kúdiktilerdiń biri Natalá Iýdına óz kinásin moıyndap, belgili akter Tuńǵyshbaı Jamanqulovqa jáne qylmystyq istiń basqa fıgýranttaryna qarsy aıǵaq berdi dep habarlaıdy tengrinews.kz.
Sybaılas jemqorlyqqa qarsy is-qımyl ulttyq búrosynyń ókilderi Natalá Iýdınanyń bultartpaý sharasy ózgergenin habarlap otyr. Buǵan deıin ol qamaýda bolǵan.
"(...) Iýdına Natalá úı qamaýynda", - dep habarlady Ulttyq búronyń tergeý departamentiniń jetekshisiniń orynbasary Olesá Keksel.
Almaty qalalyq sotyndaǵylar bultartpaý sharasynyń ótken jyldyń 29 jeltoqsanynda QR Antıkorrýpsıa qyzmeti jedel-tergeý tobynyń jetekshisiniń ótinishi boıynsha ózgergenin aıtty.
"Tergeý áreketteriniń óndirisi kezinde kúdikti Iýdına qylmysyn moıyndap, qylmysynyń mán-jaıyn tolyqtaı aıtyp berdi, osydan keıin ol qupıa tergeý áreketterine óz erkimen qatysý jolymen tergeýge belsendi kómek kórsetip, T.K.TURAN UNIVERSAL BUSINESS JSHS quryltaıshysy Tuńǵyshbaı Jamanqulovtyń jáne istiń basqa fıgýranttarynyń qylmysyn áshkereleýge járdemdesti", - dedi Almaty qalalyq sotynyń aqparatpen qamtý bóliminiń basshysy Dıas Mahambetov. Ol bul málimetterdi Medeý aýdandyq №2 sotynyń qaýlysyna negizdele otyryp habarlap otyr.
Sonymen qatar, sottyń qaýlysynda Tuńǵyshbaı Jamanqulovtyń jáne basqalardyń aıybyn dáleldeýge dál osy Iýdınanyń árekettestigi sebep bolǵany aıtylady. Osy arqyly qylmystyq istiń fıgýranttary óz kinásin moıyndap, kelgen shyǵyndy ótep jatyr eken.
"Iýdına Natalá 2014 jyly "Fenıks" kınojobasynyń óndirisi barysynda AlmaStore JSHS, "SkorobeıStýdıo" JK, A.J.Ibragımovanyń jeke kásipkerligi, "Rýsnakov" JK arqyly ıemdený jáne jaratý jolymen búdjet qarajatyn jymqyrǵan, bul qarajat "Fenıks" kınojobasyna bólingen", - dedi Dıas Mahambetov.
Aıta keteıik, qarajat jymqyrý isinde rejıser Talgad Jánibekovtiń de aty atalady. Ol ótken jyldyń jeltoqsanynda 2 aıǵa qamaýǵa alynǵan bolatyn. Rejıser ózine taǵylǵan aıyptarmen kelispeı otyr.
Natalá Iýdına QR Qylmystyq kodeksiniń 189-babynyń 4-bóligi ("Senip tapsyrylǵan bóten múlikti ıemdenip alý nemese talan-tarajǵa salý") boıynsha aıyptalyp otyr, ıaǵnı "Fenıks" kınojobasynyń óndirisine bólingen qarajatty jymqyrǵan degen aıyp. Ony Antıkorrýpsıa qyzmetiniń tergeýshileri 25 qazanda ustaǵan. 28 qazannan 29 jeltoqsanǵa deıin ol qamaýǵa bolǵan.
19 qańtarda Sybaılas jemqorlyqqa qarsy is-qımyl ulttyq búrosynyń tergeý departamentiniń basshysynyń orynbasary Olesá Keksel "Fenıks" fılminiń túsirilimine bólingen qarajatty jymqyrý boıynsha qylmystyq istiń tergeýi aıaqtalǵanyn habarlady.
Sotaldy tergeý barysynda Jamanqulovtyń 6 mıllıon teńge kóleminde shyǵyndy ishinara ótegeni aıtylǵan edi. Akter osyǵan deıin óz kinásin tolyqtaı moıyndaǵan bolatyn.
