Almatyda Túrkıa konsýldyǵynyń mańynda er adam óz-ózin órtedi dep habarlaıdy tengrinews.kzİİD resmı ókili Saltanat Ázirbekke silteme jasap. Ol Túrkıanyń 44 jastaǵy azamaty bolyp shyqty.
Polısıa ókilderiniń málimetinshe, quqyq qorǵaý organdarynyń qyzmetkerleri órtti sóndirýge tyrysqan. Kúıik shalǵan er adam aýrýhanaǵa jetkizildi.
"Túrkıa azamaty Túrkıanyń konsýldyǵyn keldi. Ol konsýldyqtyń kúzetshisimen janjaldasty. Keıin kelýshi narazylyq bildirip, ústine belgisiz suıyqtyq shashyp, ózin ot qoıdy. Oǵan mamandandyrylǵan kúzet qyzmeti basqarmasynyń qyzmetkeri kelip, jerge qulatyp, óshire bastady. Shuǵyl túrde jedel járdem shaqyryldy", - dep habarlady Almaty qalalyq İİD ókilderi.
Qalalyq İİD baspasóz qyzmetiniń málimetinshe, er adamnyń denesiniń 18 paıyzyn kúıik shalǵan. Ol Almaty qalalyq jedel shuǵyl kómek kórsetý aýrýhanasyna jetkizilgen.
"Oqıǵa ornyna Medeý aýdanynyń jedel toby jóneltildi. Olar oqıǵanyń mán-jaıyn anyqtap jatyr", - dep habarlady İİD ókilderi.
Al keıinirek hırýrg Nurjan Isabekov Túrkıa azamatynyń densaýlyq jaǵdaıy jaıly aıtyp berdi. "Betin, basyn, moınyn, keýdesin, qoldaryn kúıik shalǵan. Ádettegi kúıik shalǵan jaǵdaıda kórsetiletin em taǵaıyndaldy", - dep habarlady dáriger.
