«Habar» arnasy boks súıer qaýym úshin Fransısko Vargas pen Mıgel Berchelt arasyndaǵy aıqas pen Búkil álemdik boks serıasynyń 7-maýsymy aıasynda «Astana Arlans» jáne «Russian Boxing Team» komandalarynyń jekpe-jegin kórsetedi.
KÁSİBI BOKS: VARGAS-BERCHELT
29 qańtar kúni tańǵy saǵat 9.00-de bylǵary qolǵap sheberleri Fransısko Vargas pen Mıgel Berchelt arasynda WBC nusqasy boıynsha álem chempıony ataný úshin alǵashqy jeńil salmaqtaǵy (59 kg deıin) on eki raýndtyq judyryqtasý tikeleı efırde kórsetiledi.
Sporttyq shara Kalıfornıa shtatynyń Indıgo qalasyndaǵy «Fantasy Springs Resort Casino» qonaq úıinde ótedi. Translásıanyń komentatorlary - sport salasynyń sarapshylary Aıdar Mahmetov pen Aıbek Qabylshaev.
«Biz únemi álemdik deńgeıdegi sportshylardyń ónerin kórsetkimiz keledi. Bul jekpe-jek te solardyń biri. Eki boksshynyń da tehnıkalyq daıyndyǵy kúshti, sondyqtan dál aıqasty kórý kórermenge qyzyqty bolmaq. Boks jankúıerlerine unaıdy degen oıdamyz»,- dedi «Habar» arnasynyń sport prodúseri Asqat Jaqaev.
Dál sol keshte Takashı Mıýra jáne Mıgel Roman arasynda jartylaı jeńil salmaqtaǵy chempıondyq ataq úshin on raýndtyq jekpe-jek kórsetiledi.
Fransısko Vargas – meksıkalyq boksshy, 1984 jyly (32 jasta) dúnıege kelgen. WBC nusqasy boıynsha 2-shi jartylaı jeńil salmaqtaǵy álem chempıony, álem chempıonatynyń (2007, 2009 jj) jáne olımpıada oıyndarynyń (2008j ) qatysýshysy. Kásibı boksqa 2010 jyly aýysqan. Laqap aty - «Bandıt».
Mıgel Berchelt – meksıkalyq boksshy, 1991 jyly (25 jasta) dúnıege kelgen. WBO nusqasy boıynsha birinshi jeńil salmaqtaǵy álem chempıony. Meksıkanyń úsh dúrkin chempıony. Laqap aty – «Shaıan» («Skorpıon»).
Takashı Mıýra – japondyq boksshy, 1984 jyly (32 jasta) dúnıege kelgen. WBC nusqasy boıynsha 2013 jyldan 2015 jyldar aralyǵyndaǵy álem chempıony.
Mıgel Roman - meksıkalyq boksshy, 1985 jyly (31 jasta) dúnıege kelgen. Chempıondyqqa úmitkerlerdiń biri.
BÚKİL ÁLEMDİK BOKS SERIASYNYŃ 7-MAÝSYMY
3 aqpan kúni saǵat 23.00-de eń bedeldi týrnırlerdiń biri - Búkil álemdik boks serıasynyń (World Series of Boxing) jańa maýsymy bastalady. Jyldaǵy dástúr boıynsha «Habar»
arnasy astanalyq «Astana Arlans» klýbynyń qatysýymen ótetin jekpe-jekti tikeleı efırde kórsetedi.
Alǵashqy kezdesý Máskeý qalasynda «Dınamo» Sport saraıynda «Russian Boxing Team» jáne eki dúrkin jeńimpaz atanǵan «Astana Arlans» arasynda ótedi. Qazaqstandyq komanda quramyna 10 salmaq dárejesi boıynsha 20 boksshy jáne qosymsha quramǵa 17 boksshy kirgen.
Búkil álemdik boks serıasynda «Astana Arlans» komandasy eń ataqty klýbtardyń biri, bizdiń jigitter eki márte úzdikterdiń qatarynan kórinip, jeńis tuǵyrynan kóringen bolatyn.
