Qazaqstanda IMEI-kodtardyń biryńǵaı bazasynda tirkelmegen telefondar buǵattalady dep habarlaıdy tengrinews.kz.
Jańa normalaryna ótken jyldyń 22 jeltoqsanynda qol qoıylǵan "Qazaqstan Respýblıkasynyń keıbir zańnamalyq aktilerine ekstremızm jáne terorızm máseleleri boıynsha ózgerister engizý týraly" zańda telefondardyń ıdentıfıkasıalyq kodtaryn biryńǵaı bazaǵa tirkeýdiń mindetti ekeni kórsetilgen. Qazir Qazaqstanda IMEI-kodtardyń biryńǵaı bazasyn qurý jumystary bastaldy. Kcell men Beeline baspasóz qyzmetindegilerdiń aıtýynsha, QR Aqparat jáne komýnıkasıa mınıstrligi osy másele boıynsha uıaly baılanys operatorlarymen jıyn ótkizgen.
"Uıaly baılanys operatorlary 2017 jyldyń qańtarynda QR "Baılanys týraly" jáne "Qazaqstan Respýblıkasynyń keıbir zańnamalyq aktilerine ekstremızm jáne terorızm máseleleri boıynsha ózgerister engizý týraly" zańdaryna qajetti ózgertýler engizilgen soń, IMEI-kodtardyń biryńǵaı bazasyn qurýǵa baǵyttalǵan jumystardy bastady", - delingen Kcell baspasóz habarlamasynda.
Osy zańǵa sáıkes, uıaly baılanys opeartorlary ýaqytynda tirkelmegen abonentterdi buǵattaıdy. Aıta keteıik, bul zań 2017 jyldyń 1 shildesinen bastap kúshine enedi.
"IMEI-kodtardyń biryńǵaı bazasyn qurý týraly zańnyń erejesi mynandaı: abonentterdi tirkeý jáne tirkelmegen abonent ıelerine uıaly baılanys qyzmetterin qoldanýǵa tyıym salý. Endi uıaly baılanys operatorlaryn tirkeý 2017 jyldyń 1 shildesinen bastalady", - dep túsindirdi Kcell baspasóz qyzmetindegiler.
Kcell, Beeline ókilderi IMEI-kodtardyń biryńǵaı bazasyn jasaý boıynsha jumys tobyna qosyldy. Sondaı-aq, Kcell ókilderi osy zań engizilgen soń, memlekettik organdardaǵy aqparattyq júıemen qalaı baılanysta bolatyny jaıly talqylap jatqanyn aıtty.
"Biz qazir arnaıy jumys tobynyń aıasynda jumys istep jatyrmyz. Osy másele boıynsha jáne basqa da ózekti máselelerge qatysty usynystar daıyndap jatyrmyz. Operatorlarda zańnamada kórsetilgen mindetter bar. Biraq qazir operatorlardyń osy jobany júzege asyrý úshin naqty nemen aınalysatyny belgisiz bolyp tur", - delingen Beeline baspasóz qyzmetindegilerdiń Tengrinews.kz tilshisi joldaǵan saýalyna bergen jaýabynda.
Zańǵa sáıkes, jaqyn arada abonentterdi tirkeýge qatysty erejeler daıyn bolýy qajet. Qazaqstandyqtardyń telefondardy qalaı tirkeıtini ázirshe belgisiz, sebebi bul jobanyń jumys isteý mehanızmi áli oılastyrylmaǵan eken. Beeline ókilderiniń aıtýynsha, qazirgi ýaqytta uıaly baılanys operatorlary osy másele boıynsha usynystaryn daıyndap jatyr.
"Qazir taraptar (operatorlar, bıliktegiler) osy máseleni talqylap jatyr. Birneshe nusqa bar. Biraq endi bul jobanyń barynsha ońaı ári jeńil júzege asyrylyp, sondaı-aq, onyń eshbir aqaýsyz jumys isteýi úshin ne jasaý kerektigi oılastyrylyp jatyr", - dedi Beeline ókilderi.
Sondaı-aq, uıaly baılanys operatorlary telefondardy tirkeýdiń tıimdiligi nede ekenin aıtyp ótti.
"Qujattamaǵa sáıkes, IMEI-kodtardyń biryńǵaı bazasyn qurý bireýdiń múligin urlaý derekteriniń aldyn alýǵa baǵyttalǵan. Sonymen qatar, qujattamada Qyrǵyzstan Respýblıkasynyń abonetterdiń ıdentıfıkasıalyq kodtaryn tirkeý týraly zańnamasyndaǵy erejelerdiń jáne halyqaralyq tájirıbelerdiń, ıaǵnı, Túrkıa, Ázirbaıjan, Ýkraına elderindegi tájirıbeniń jaqsy nátıje kórsetkeni mysal retinde keltirilgen", - dep túsindirdi Kcell ókilderi.
"Biz mundaı bazany engizýdiń tıimdiligine qatysty qandaı da bir pikir bildire almaımyz. Alaıda basqa elderdegi tájirıbege qarasaq, olarda osy zańńama arqyly uıaly telefondar men basqa da qurylǵylardy urlaý derekteri azaıǵan", - dedi Beeline ókilderi.
