Kúndelikti qaıtalanyp jatqan mánsiz ómirine bir sát kóz júgirtken qart ana, qolyna qalam alyp ishki sherin o dúnıelik shalyna bylaı aqtardy:
« — Ááı, shalym! Sońǵy kezderi kelinniń kóńil-kúıi joq, tipti shaıymdy da jartyp bermeıtin boldy. Qudaı-aý, qulaqtarym da aýyr estıtin bop júr. Sodan ba, áıteýir ne degenin de durys túsine bermeımin. Degenmen bir nárseni ishim sezedi. Olaı deıtinim, kelinim myna úıde turǵanymdy qalamaıtyn sıaqty.
Ótken kúnderimiz-aı?! Balańdy óziń de jaqsy bilesiń, qoı aýzynan shóp almaıtyn jýas. Baıǵus bala qazir eki ottyń ortasynda qalyp «Bylaı tartsań — arba synady, olaı tartsań — ógiz ólediniń» kúıin keship júr, qaıtsin endi?!
Anasy — atsa, atylmaıdy, sataıyn dese, satylmaıdy. Jasyryn kelip qushaqtap qoıady. Bilesiń be, keshe keshkisin kelip betimnen súıdi. Áıtse de myna qylyǵy maǵan aýyr tıdi.
Ol endi maǵan irimshik ákelýdi qoıdy. Tisterim joq qoı, jegen kezdegi jaǵymsyz daýystan balalar jıirkenedi eken menen. Qudaı-aý, bul ótirik, men olaı istemeımin ǵoı. Kelin bala nemerelerime ertegi aıtyp berýime tyıym saldy. Senimen sóılesedi dep qabyrǵadaǵy sýretińdi de tyǵyp qoıdy. Jaraıdy, biraq qoınymdaǵy sýretten olardyń esh habary joq.
Men oǵan teris bata jasamaımyn, sebebi nemerelerimniń anasy ǵoı. Ótkende joǵarydaǵy kórshiler keldi. «Sózderimizdi estip qoımasyn» dep esigimniń syrtynan qulyptap qoıdy. Sózderin estimedim, estı almadym, biraq ne degenderin sezdim. Kelesi aıda meni qarttar úıine jibermekshi eken.
Nesin aıtaıyn, óte aýyr tıdi. Shalym-aý, sen ne deısiń?! Ulyńnyń kózine bir kórinip qoısańshy! Ákesisiń ǵoı, bálkim seni tyńdap qalar. Osy bólmede otyra berem, Qudaı kýá eshqaıda shyqpaımyn. Ulymnyń tátti ákelgenin de qalamaımyn. Budan bylaı balalarǵa ertegi de aıtpaımyn. Áıteýir meni osy úıden shyǵaryp tastamasa boldy.
Bári bitti, endi ózińmen ótken kúnder uzap barady. Terezege qarasam beıneń kóz aldymnan ketpeıdi. Esik tutqalarynda saýsaq izderiń qaldy. Asa taıaǵyń áli kúnge qabyrǵada ilýli. Sonda bulardyń menimen turǵylary kelmeıtini nesi?! Tań qalamyn… Áı, ótip bir ketken dáýren-aı! Meni qasyńa shaqyrsań netti! Álde sen de meni umytyp kettiń be?!»
Ata-anany renjitpeıik dostar! Olardy renjitpek túgili, jumsaǵan ýaqytynda «Úff!» dep aıtýdyń ózi kúná eken! Sondyqtan, oılanaıyq! Mundaı jaǵdaı qazir kóbeıip ketti, rasynda! Oǵan jol bermeý kerekpiz! «Sıyrǵa týǵan kún — buzaýǵa da týady» deıdi ǵoı, sol sıaqty ata-anamyzǵa jasaǵanymyz óz aldymyzdan shyǵatynyn umytpaıyq… Biz de qartaıamyz.

Jazba Facebook áleýmettik jelisinen alyndy