Jaqynda Arman Álmenbettiń Facebook paraqshasynda qazaqtyń belgili jazýshysy İlıas Esenberlın jaryn qalaı tańdap alǵany jaıly ǵıbratty áńgime jazylypty. Sony sizdermen bólisýdi jón sanadyq.  

Tursyn Jurtbaıdyń aıtqany: "İlıas Esenberlın týraly estelik aıtyńyz dep urpaqtary keldi. Aıtyp otyryp, kózime jas keldi. Oǵan sebep bolǵan – esime túsip ketken myna bir áńgimesi...
İlekeńniń jary "halyq jaýynyń" qyzy bolǵan. Sonyń zardabyn İlekeń de tartqan. Sodan suraımyn ǵoı, "Halyq jaýynyń" qyzy ekenin bile turyp, nege osy kisini aldyńyz?" dep. "Sonshalyqty kúshti máhabbat boldy ma?" deımin. "Jó-óq-q" deıdi İlekeń... Sodan soń oılanyp baryp áńgimesin bastaıdy: "Bir kúni kóshede kele jatsam, kózine muń uıalaǵan bir qyz kele jatyr eken. Muńly bolǵanda da muńly. Toqtatyp, birnárse suraǵan bolyp nazaryn ózime aýdaryp edim, kózi shynynda da buryn men kórmegen muńly kóz eken. Sodan soń syrtynan surastyryp bilip aldym, aralasa bastadyq. Ózim de oılaǵandaı, "halyq jaýynyń" qyzy bolyp shyqty. Kózindegi muńy bir sátte paıda bolatyn muń emes, ábden boıyna sińip qalǵan muń eken. Ýaqyt ótken saıyn júregim jibı berdi. Aqyry bir kúni "seni alamyn, tıesiń be?" – dedim. Qyz jylady, "meni alsańyz kúnińiz kún bolmaıdy ǵoı", – dedi. "Táýekel, alamyn", – dedim. "Jalǵyz sheshem bar ǵoı", – dedi. "Meıli, shesheń qolymyzda tursyn, óle-ólgenshe baǵyp-qaq", – dedim. "Sheshemmen aqyldasaıyn", – dedi. Bir-eki kúnnen soń sheshesiniń aldyna bardym. "Qaıda isteısiń, balam?" – dedi. "SK-da". "Oıbý-ý!" – dedi. "Soryńdy qaınatady ǵoı". – "Bárine daıynmyn, táýekel", – dedim. – "Jaraıdy, tek bul baıǵusty jylatyp tastap ketýshi bolma". Sóıtip, osy kisini alǵanmyn. Sheshesi qaıtqansha qolymyzda turdy".
İlekeńniń osy áńgimesi esime túsip kózime jas kelmesi bar ma... Meni qoltyqtap alyp, odaqtyń úshinshi qabatynda ári-beri júrip áńgimesin aıtatyn. Sondaı bir kúni aıtqany ǵoı. Qazaqtyń bir qyzynyń baǵyn ashamyn dep istegeni ǵoı..."

Tursyn Jurtbaı osyny aıtyp, ózi de az ýaqyt únsiz otyrdy.