Aqtóbe oblysynyń bıligi 2016 jyly 499 adamdy qysqartqan "Velıkaıa stena" qytaılyq munaı kompanıasyna qatań talaptar qoıdy. Bul kompanıa ortasha jalaqy men áleýmettik tólemder somasyn da azaıtqan bolyp shyqty. Óńir basshysy Berdibek Saparbaev kásiporyndy jabý kerektigin aıtty, - dep habarlaıdy "tengrinews.kz".

"Barlyq jaqta jalaqy ósip jatyr, al sizderde qysqartý. Barlyq kásiporyn áleýmettik mindetterin oryndap keledi, al sizder oryndamaısyzdar. Onda sizderdiń kompanıany jabý kerek. Bizge problemaly kompanıanyń qajeti joq. Osy "Velıkaıa stenanyń" isimen aınalysatyndaı basqa isimiz joq pa? Qalǵan 900 qyzmetkerdi jumysqa turǵyzamyz, bul problema emes, al kompanıany zań aıasynda jaýyp tastaımyz", - dedi ákim.

Al JSHS basshysy Chjan Szún óz kezeginde kompanıanyń qyzmetkerlerdi ne úshin qysqartqanyn aıtyp, aqtaldy. "Qyzmetkerlerdiń jalaqysy kompanıanyń barlyq shyǵynynyń 28 paıyzy. Burǵylaý boıynsha materıaldyq shyǵyn, onyń ishinde dızel otyny - 30 paıyz. Taǵy da 30 paıyz bý qondyrmalarynyń amortızasıasyna jumsalady. Sondaı-aq, kólik shyǵyndary bar. 2016 jyly jumys kólemi az bolǵandyqtan, shyǵynymyz 1 mıllıard 600 mıllıon teńge boldy", - dep málimdedi ol.

Saparbaev "Velıkaıa stenanyń" quryltaıshylardan 100 mıllıon dollar alǵanyn, bul qarajattyń kásiporynnyń barlyq kerek-jaraǵyna jetip-artylatynyn aıtty. Bas dırektor bolsa bul qarajattyń 24 mıllıon dollary bankke qaıtarylǵanyn, qalǵan bóliginiń Qytaıda satyp alǵan materıaldyń tólemi ekenin aıtty.

"Adamdardyń 60 paıyzyn qysqartsańyzdar, qytaı qyzmetkerlerdiń de 60 paıyzyn qysqartyńyzdar. Qysqartý bolǵanda, birinshi kezekte qytaı mamandaryn, basqa sheteldikterdi qysqartyńyz. Ekinshiden, 3-shi jáne 4-shi kategorıadaǵy qytaı qyzmetkerlerin jumysqa alýyń qajeti joq, Qytaıdan keletin mamandardyń kategorıasy 1-shi jáne 2-shi bolýy kerek", - dedi oblys ákimi.

"Birinshi ózińiz qarańyz, kompanıadaǵy jumysshylardyń sany - 900 adam, olardyń ishinde 66 adam, ıaǵnı 7 paıyzy. Biz 3-shi jáne 4-shi kategorıadaǵy qytaı mamandaryn nege alamyz? Sebebi barlyq qural-jabdyǵymyz Qytaıdan, olar isten shyqqanda, aqaýdy joıýǵa qytaı mamandarynyń múmkindikteri kóbirek", - dep jaýap berdi Chjan Szún.

Saparbaevtyń "Mundaı mamandar Qazaqstanda joq pa?" degen suraǵyna qytaı kompanıasynyń basshysy bylaı dep jaýap qatty: "Osy jyldar boıy biz sizderdiń mamandardy oqytyp keldik".

"Oqytsańyzdar, olar qaıda? Jumysqa tartpasaq, ne úshin oqyttyńyzlar - dep suraǵan ákim keıingi sózin óz qolastyndaǵylarǵa qazaq tilinde jalǵady. - Bular bizdiń mamandardy oqyttyq deı me? Olar qaıda? Qaıda qarap júrsizder? Endeshe bylaı: 3-shi jáne 4-shi kategorıadaǵy qytaı mamandaryna ruqsat bermeńizder! Budan eshteńe shyqpasa, vızany da bermeımiz".

Osy dıalogtan keıin qytaı kompanıasynyń basshysynan qysqartýǵa ushyraǵan qansha qyzmetkerdiń "Velıkaıa stenaǵa" oralatyny jaıly suraldy.

Chjan Szún "ýaqy berýdi" surady. "Aqpanda eki burǵylaýdy ashamyz, ıaǵnı 114 adam jumysqa oralady. Eseptep kórsek, 2017 jyly jumys kólemi maksımaldyq deńgeıge jetkende, jumysta 800 adam bolady. Alaıda ázirshe jumys kólemi ortasha, 600 adam jumys isteıdi. Barlyq qyzmetkerdi qaıtaramyz dep ýáde bere almaımyn, biraq sizden ýaqyt suraımyz", - dedi ol.

Saparbaev aqtóbelik bıliktiń baılanysy jaqsy ekenin, sondyqtan "Velıkaıa stena" basqa óńirlermen jumys isteı bastasa, Chjan Szúnge qoldaý kórsetýge ýáde etti. Naqtyraq aıtqanda, Atyraý, Mańǵystaý jáne Batys Qazaqstan oblystary, sondaı-aq, Reseı óńirleri. Alaıda ákim kompanıany jabý máselesin qaıta kóterdi.

"Quryltaıshylarǵa hat joldaý kerek. Kásiporynnyń ekonomıkalyq jaǵdaıyn jaqsartpasa, quzyrly organnyń kómegimen bankrottyqqa deıin barý úshin shara qoldanamyz. Bizge problemasy kóp kompanıanyń qajeti joq. Aqtóbe oblysynyń ekonomıkasy bul kompanıaǵa táýeldi emes. Qazir 900 adamnyń 422-si bul kompanıada jumys istemeıdi. Qalǵan 500 adamǵa biz jumys taýyp beremiz", - dedi oblys basshysy qolastyndaǵylarǵa.