DEMOSCOPE qoǵamdyq pikirge jedel-monıtorıng júrgizý búrosy Qazaqstan azamattary arasynda «Medısınalyq qyzmet kórsetý. QR Densaýlyq saqtaý júıesi» taqyrybynda saýalnama júrgizdi.
Saýalnamaǵa Astana, Almaty qalalary men 14 oblys ortalyǵynan 18 jastan asqan 1937 adam qatysty. Áıelder – 82%, er azamattar – 18%. İrikteý yqtımaldyǵy 90%, sondyqtan statısıkalyq kórsetkish qateliginiń shekti mólsheri 0,97%-dan aspaıdy.
Saýalnama ádisi – telefon arqyly júrgizilgen suhbat jáne onlaın-saýalnama. Zertteý 2016 jyly 21-30 jeltoqsan aralyǵynda júrgizildi.
Qazaqstandyqtar medısınalyq qyzmetterdi aqyly paıdalanaýdan bas tartpaıdy. Halyqtyń 51%-y tutynýshylardyń qalaýynsha aqyly jáne tegin qyzmetterdi engizýdi durys deıdi. Qazaqstan medısınasyna bes baldyq júıe boıynsha «úsh nemese odan tómen» dep baǵa bergen qazaqstandyqtar – 65%.
Basqa aımaqtarǵa qaraǵanda Almaty men Soltústik Qazaqstan turǵyndarynyń kóbi medısına sapasyn nashar deıdi. Bul pikirdi 38% almatylyqtar men 36% soltústik qazaqstandyqtar bildirdi. Jalpy, densaýlyq saqtaý júıesin «óte jaqsy» dep baǵalaǵandar nebári – 2,5%. Sondaı-aq, 10,5% respondentter elimizde medısına salasynda bolyp jatqan birneshe jaǵymdy jańalyqtardy atap ótti, biraq sońǵy ýaqytta nasharlap bara jatqanyn moıyndaý kerek deıdi.
Saýalnama barysynda elimizdiń densaýlyq saqtaý júıesindegi negizgi máseleler jaıly qazaqstandyqtardyń kózqarasy suraldy. Jaýap bergen azamattardyń 61%-y bilikti mamandardyń jetispeýshiligi, medısınalyq bilimniń tómendigi jáne myqty mamandardyń shet elderge qonys aýdarýy dep jaýap berdi. Sondaı-aq, medısına salasy qyzmetkerleri jalaqylarynyń azdyǵyn negizgi problemalar qataryna jatqyzǵandar – 14%. 10% respondentter dári-dármekter jetispeıdi ári óte qymbat baǵamen satylady dep shaǵymdandy. Sonymen qatar, medısınalyq mekemelerdegi jemqorlyq pen emhanalardyń jetkilikti deńgeıde tehnıkamen jabdyqtalmaýyn 4% azamattar atap ótti.
Densaýlyq saqtaý salasyndaǵy kemshilikterge baılanysty, keıbir azamattar dárigerler kómegine júgingenshe, óz betinshe emdelgendi jón kóredi. Naqty aıtar bolsaq, 23% respondentter «tanystarymnyń keńesine, halyq emine jáne ınternettegi aqparatqa júginemin» dep jaýap berdi. Bul jaýapty tańdaǵandaryń kóbi 60-69 jas aralyǵynda. Shyǵys Qazaqstan oblysy turǵyndarynyń kóbi osy jaýapty tańdady.
