«Oqý ınemen qudyq qazǵandaı» demekshi, qaı ýaqytta bolsyn, qaı jasqa kelseńizde bilim alýǵa eshqashan kesh emes jáne eshqandaı kedergi joq. Qazaqtyń boıyna sińgen dara qasıetterdiń biri erte bastan bastap hat taný, zerdesin ashý. Osy bolmystarynyń arqasynda óziniń ǵylymǵa , oqý- bilimge degen zerektigin baıqatyp jatady. Kóshpeli ómir keship, saıyn dalanyń qushaǵynda terbelgen ańqaý da, baýyrmashyl qazaqtyń óner bilimge degen qushtarlyǵy erekshe bolatyn. Sol qasıet qazirde óz qundylyǵyn joǵaltpaǵan. El arasynda tili shyǵa salyp, hat tanyp, qazaqtyń batyrlarynyń jyrlaryn, ertegi dastandaryn jatqa oqyp, eldi tamsandyryp júrgen danalarymyzdyń qatary az emes. Osydan-aq qazaqtyń ár balasynyń asqaq arman men jarqyn bolashaqty qalaıtynyn baıqaımyz. Muhtar Áýezov: «Halyq pen halyqty, adam men adamdy teńestiretin nárse-bilim» degen edi. Osy sózdi erte bastan jete túsingen tulǵalarymyzdyń basty maqsaty- qarańǵy qazaqtyń kógine kún bolyp jaryq túsirip, asqaq rýhyn serpiltip, ózge jurtpen irgemizdi teńestirý.
Bar qıyndyq pen azapty, halyqtyń kórgen qorlyǵyn oqý-bilimniń shyraǵyn ustaý arqyly jeńýge bolatynyn jete uǵynǵan darabozdarymyzben tanysyp ótsek.
Alashtyń arda kósemi, ádebıet kóginde jarqyrap janǵan jaryq juldyzdyń biri jáne biregeıi- Maǵjan Jumabaev 4 jasynan bastap hat tanyǵan eken.
Qazaq halqynyń tuńǵysh aǵartýshysy, qazaq balalar ádebıetiniń atasy - Ybyraı Altynsarındi atasy Balqoja bı 3 jasynan bastap, óz tárbıesine alyp bilimge baýlı bastaǵan.
Qazaqtyń kógine kún bolyp jarqyrap shyqqan alyp shyńymyzdyń biri – Sultanmahmut Toraıǵyrovtyń ózi 6 jasynda hat tanyǵan bolatyn.
Shyǵystyń quıryqty juldyzy bolyp jarq etken, ozat oıshyl-SHoqan Ýálıhanov 5 jasynda hat tanyp, orystyń zıalylaryn moıyndatqan bolatyn.
Ádebıet áleminiń bıik asýyn baǵyndyrǵan , qazaqtyń biregeı qalamgeri, jazýshylyqtyń kóginde qyrandaı qalyqtaǵan Muhtar Áýezov erte jasynda hat tanýmen qatar, 15-16 jasynda kórkem shyǵarma jazýǵa beıimdelip, alǵashqy qadamdaryn jasaǵan .
Ataqty aqyn, ǵulama oqymysty, qarshadaıynan bilimge bas qoıǵan Máshhúr Júsip Kóbeev 5 jasynda hat tanýmen qoımaı, arab parsy tilderin jetik meńgergen .
El úshin sol bir qıyn qystaý kezeńderde bilim alyp , qarańǵy qazaqtyń qatarynan ozyp shyǵyp saýatty bolýdyń ózi qıyn is edi. Osy aýyr júkti erte jastan bastap kótere bilgen, óz tabandylyǵy men qaısarlyqtarynyń arqasynda ozyq bolyp alǵan shyqqan, uly tulǵalardyń uly qadamdaryna tańqalmasqa bolmaıdy.
Kógershin Tilegen
