Nekeli tórt áıeli bar qaraǵandylyq azamat Qýanysh Hantóre 8 naýryz merekesinde áıelderine qandaı syı jasaıtynyn aıtty, dep habarlaıdy Baq.kz agenttiginiń Qaraǵandydaǵy tilshisi.
Qaraǵandy oblysynyń Shet aýdanynda turatyn Qýanysh Hantóre sharıǵat jolymen tórt áıelge úılengen. Elýdiń bel ortasyna kelip qalǵan Qýanysh Hamıtuly búginde úlken shańyraqtyń otaǵasy bolyp otyrǵan jaıy bar.
Qýanysh Hantóre báıbishesimen 1986 jyly 22 jasynda otaý quryp, alty balanyń ákesi atanady. Osydan keıin 2001 jyly ekinshi ret úılenýge bel býǵan otaǵasy týǵan-týystarynyń qarsylyǵyna qaramastan ózinen 17 jas kishi qyzben nekelesedi. Ekinshi áıelinen alty bala súıgen otaǵasy Shet aýdanynyń ortalyǵynan eńseli úı turǵyzyp, eki áıelimen sol úıde qonystanady. 2006 jyly tórt balamen jesir qalǵan áıelmen nekelesip, balalaryn baýyryna basqan. Sol jyldary sharýa qojalyǵyn ashyp, mal sharýashylyǵymen aınalysqan Qýanysh Hantóre úshinshi áıeliniń otaýyn osy qystaqqa tigedi. 2014 jyly Qýanysh Hamıtuly eki balamen jesir qalǵan dosynyń áıeline tórtinshi ret úılenedi. Tórtinshi áıelin Qýanysh ekinshi qystaqqa ornalastyrady. Yntymaǵy jarasqan, ónegeli otbasynyń asyraýshysy, otaǵasy Qýanysh Hantóre búginde aýyl-aımaqqa, týǵan-týysqa syıly azamat. Halyqaralyq áıelder merekesiniń qarsańynda Qýanysh aǵaǵa habarlasyp, áıelderine qandaı syı jasaıtynyn surap bilgen edik.
«Bul merekeniń maqsaty áıelderdiń, analardyń kóńilin kóterý, olarǵa yqylas bildirý dep oılaımyn. Al, ózime keletin bolsam áıelderime eń birinshi jylýlyq syılaımyn. Olardy balalarymnyń anasy, jalpy qazaqtyń, eldiń anasy dep qurmettep, merekede ózgeshe kóńil bildiremin», - deıdi Qýanysh Hantóre.
Tórt áıelinen 16 bala, jıyrmaǵa tarta nemere súıgen Qýanysh Hamıtuly boıyndaǵy jylýlyqtyń áıelderine, balalary men baýyrlaryna da jetetinin aıtady.
«Alla «ózime uqsatyp jarattym adamzatty» degen eken. Adamnyń boıynda úlken rýhanı qýat bar eken. Meniń de boıymdaǵy jylýlyq áıelderime, balalaryma, baýyrlaryma jetedi. Qazaq jesirin jylatpaǵan, jetimin jáýteńdetpegen - halyq. Meniń eki áıelim jesir, olardyń tórt balasyna qamqorlyq kórsetemin. Shamam kelgenshe pana bolýǵa tyrysamyn», - deıdi tórt áıel alǵan qazaq.
«Áıelderimdi alalamaımyn, olardyń minez-qulqyn, ahýalyn, rýhanı jaǵdaıyn, kóńilin bilemin, soǵan qaraı syılyq jasaımyn. Bireýge jylýlyq, bireýge mahabbat kerek, endi bireýine jyly sózder aıtamyn. Materıaldyq turǵyda da syılyqtar jasaımyn. Olarǵa erim bar, azamatym bar dep marqaıyp, eńsesi kóteriletindeı syılyq jasaýǵa tyrysamyn. Osylaısha árbir áıelimdi qýantamyn», - deıdi Qýanysh Hamıtuly.
Osyndaı úlken otbasynyń otaǵasy áıeldermen qatar analardy da merekemen quttyqtaıtynyn aıtady.
«Qazaqtyń qasıeti, dana analary kóp bolǵan. Búgingi urpaq, qyzdarymyz, áıelderimiz sol analardaı el anasy bolsyn degen tilegimdi aıtqym keledi. Analarymyz aman bolsyn!», - degen tilegin jetkizdi Qýanysh Hantóre.
Qýanysh Hantóreniń 89 jastaǵy anasy ózimen birge turady. Tórt áıeldiń bir otbasynda tatý-tátti turyp, shańyraǵynyń shaıqalmaı, tútininiń túzý shyǵýyna osy asyl ananyń da septigi tıetin bolar.
