Almaty qalasy ákimdiginiń uıymdastyrýymen 2017 jyldyń 22 naýryzynda Astana alańy men Atletter aýylynda «Naýryz merekesi» toılanady.
Astana alańyna kıiz úıler, ár túrli qostar, shatyrlar tigilip, Naýryz taqyrybyna oraı jasalǵan ınstallásıalar ornatylady. Merekede «Múshel» atty teatrlandyrylǵan kórinis kórsetilip, qazaqtyń kóneden kele jatqan « Samalyq», «Túlik jyry» atty salt-dástúrli, rıtýaldy án-jyrlary oryndalady.
Merekelik qoıylym ótetin alań birtutas sahnalyq keńistik prınsıpimen bezendiriledi. Barlyq merekelik is-sharalar, án-bı, teatrlandyrylǵan qoıylym KBTÝ ǵımaratynyń aldyna jınalǵan búkil jurtshylyq birdeı kóretin sahnada ótedi.
Al Atletter aýylyndaǵy merekelik qoıylym ótetin alań tutastaı jańa qonystanǵan qazaq aýylyn elestetedi. Alańnyń kireberisine ejelgi úlgidegi qaqpa ornatylyp, onyń eki jaq shetine kóne kúıme ústine tigilgen 2 kıiz úı qoıylady.
Mereke ótetin alańǵa «shamdal», «qos», «kóne saýda arbalary», «tańbaly tastar», «tarıh tegershigi» atty ınstallásıalar jáne ulttyq nyshandaǵy ár túrli músinder qoıylady.
«Ulystyń uly kúni» merekesinde Ramazan Stamǵazıev, Nurjan Janpeıisov, Tileýles Qurmanǵalıev, Erkin Shúkiman, Aıgúl Qosanova syndy qazaqtyń tanymal ánshileri, N. Tilendıev atyndaǵy «Otyrar sazy» fólklorlyq-etnografıalyq orkestri, «Qońyr», «MýzArt», «Alashuly» toptary, Aıqyn, Álı Oqapov,Móldir Áýelbekova, Marjan Arapbaeva sıaqty tanymal estrada juldyzdary óner kórsetedi.
