Qazaqstan telearnalarynan gıgıenalyq zattar jarnamasyn kórsetýge tyıym salý usynyldy, dep habarlaıdy QazAqparat.
QR Aqparat jáne komýnıkasıalar mınıstri Dáýren Abaevqa mınıstrlik blogy arqyly júgingen qazaqstandyq Aınur Soltanqul mundaı jarnamalar otbasymen birge otyryp teledıdar kórgen kezde adamdy uıaltatyndyǵyn basa atap ótken. «Otbasy múshelerin nemese qonaqtardy yńǵaısyz jaǵdaıǵa qaldyratyn áıelderge arnalǵan tósemeler, músheqaptar syndy jarnamalardy alyp tastaý múmkin be?», - dep jazdy ol.
Osy oraıda, QR Aqparat jáne komýnıkasıalar mınıstrligi «Jarnama týraly» Zańǵa súıene otyryp, onyń shekteý qoıylatyn túrlerin atap ótken. Atap aıtqanda, etıl spırtin jáne alkogól ónimin, ana sútin almastyrýshylardy, sáıkestikti rastaýdan ótpegen, sáıkestigi mindetti túrde rastalýǵa jatatyn taýarlardy (jumystardy, kórsetiletin qyzmetterdi), temeki jáne temeki buıymdaryn, alkogól ónimine, temeki jáne temeki buıymdaryna suranys pen qyzyǵýshylyqty yntalandyrýǵa baǵyttalǵan ártúrli is-sharalar, sonyń ishinde utystar, lotereıalar oınatý nysanynda, qarjylyq (ınvestısıalyq) pıramıdanyń qyzmetin jarnamalaýǵa tyıym salynady.
Alkogól ónimin, temeki jáne temeki buıymyn tikeleı nemese janama usynatyn, alkogól óniminiń, temeki jáne temeki buıymynyń ataýy retinde belgili bolǵan taýar belgisiniń elementterin nemese ataýyn paıdalana otyryp, taýarlardy (jumystardy, kórsetiletin qyzmetterdi) jarnamalaýǵa tyıym bar.
«Buǵan qosa, medısınalyq qyzmetterdi, profılaktıkanyń, dıagnostıkanyń, emdeýdiń jáne medısınalyq ońaltýdyń ádisteri men quraldaryn, dárilik zattardy, medısınalyq tehnıka men medısınalyq maqsattaǵy buıymdardy, taǵamǵa bıologıalyq belsendi qospalardy jarnamalaýdyń erekshelikteri Qazaqstan Respýblıkasynyń densaýlyq saqtaý salasyndaǵy zańnamasymen retteledi. Joǵaryda aıtylǵandardyń negizinde áıelderdiń gıgıenalyq zattary men kontrasepsıa zattaryn buqaralyq aqparat quraldarynda jarnamalaý Qazaqstan Respýblıkasynyń «Jarnama týraly» zańymen shekteý qoıylmaǵan. Osyǵan oraı Siz atap ótken jarnamalardy telearnalarda taratýǵa shekteý qoıý sharalaryn qabyldaý múmkin emes», - delingen jaýapta.
