«Jetim kórseń, jebeı júr» degen qazaq atamyz. Bul maqaldyń mánine jete bermeıtn sanasyzdardyń bary kóńilińdi qynjyltady. Qatal taǵdyryna kóndige almaı júrgen jetimdi basynan sıpaýdyń ornyna qorlap, quldyqqa salyp qoıatyn adamdar qanshama. Sonyń bir dáleli Aqtóbe qalasynda oryn alǵan.  

Aqtóbede aqshaǵa aldanyp, jumysqa jegilgen jetim bala quldyqta bolǵan, dep habarlaıdy 31 arna.

Aıtýynsha, úsh aıy boıy ony Qobda aýdanynyń turǵyny qorlyqta ustap, mal baqtyrǵan. Al qashyp ketetin bolsań óltiremin dep qorqytty deıdi. Mal baqqan azamat Qobda aýdanynan Aqtóbege jaıaýlatyp qashypty. Qazir 21jastaǵy jigit oblystyq aýrýhananyń garajyn panalap júr.

Jasulan Sándibekov osydan eki jyl buryn Aqtóbedegi "Jaısan" jetimder úıinen shyqqanyn aıtady. Sodan beri  jaldanyp jumys jasap, árkimniń tabaldyryǵynda júrdim,- deıdi. Al sońǵy qojaıyny erkinen tys ustap, naǵyz qulǵa aınaldyrǵanyn aıtady. Sózinshe, aqsha tóleımin dep Qobda aýdanyna aldap alyp ketip, barǵannan keıin  kúndiz-túni maldyń sońyna salyp qoıǵan.

 Qazir quldyqtan qutylǵan Jasulan Aqtóbe oblystyq aýrýhananyń garajyn panalap júr. Jol boıynan taýyp alǵan osy aýrýhananyń júrgizýshisi ony ázirge garajdyń bir bólmesine ornalastyrypty.  Qarjaý Bederov Jasulandy óz úıine tirkeýge otyrǵyzǵanyn jáne oǵan qazir jan- jaqtan jumys izdep jatqanyn da aıtady.

 Al oblystyq ishki ister departamentiniń statısıkasy boıynsha, ótken jyly  Aqtóbe oblysynda osy quldyqqa qatysty eki jaǵdaı tirkelse, bıyldyń ózinde  quldyqqa jegilgen eki áıel adam shaǵymdanyp úlgergen. Aıta ketý kerek quldyqqa jekti dep shaǵymdanǵan adamdardyń barlyǵy da  aýylsharýashylyǵymen aınalysatyn sharýa qojalyqtarynyń qurbandary eken.