Qazir kóp ákeler áıeline qolqanat, balasyna «qul» bolyp júr. Alty jasar balam «sý ishem, mama, sý ishem» dep edi, ana jaqta bala emizip otyrǵan áıelim kitap oqyp otyrǵan maǵan: «anaǵan sý quıyp bere salshy!» dedi. Men osynyń aldynda ǵana osy «Namys» saıtyndaǵy «Ákeniń bedeli qalaı ósedi?» degen anaý bir maqalany oqymaǵanda baıaǵysha ushyp túregeler me edim, miz baqpadym. Estimegen kisideı esinep-qusynap kitabymdy oqı berdim. Bir kezde emshektegi balany silke tastap qatynym julqynsyn.

«Kishkentaı ǵana nárse ǵoı, tuıaǵyń qımyldasa ólip, ketesiń be?» dep shaptyqty kep. Úndemedim. Kún kúrkirep, naızaǵaı jarqyldap, jańbyr sirkirep basylǵan soń, eshteńe bolmaǵandaı jumsaq qana, «kelshi!» dedim. «Men de muny kishkentaı nárse dep oılaıtynmyn. Joq, bul áste kishkentaı nárse emes eken, otyr, sóıleseıik!» – dedim.
 

Búginnen bastap balamnyń jumysyna meni qolqanat qylýdy toqtat! Onyń shamasy kelmeıtin, áke retinde atqaratyn, kómektesetin jumystardy, kórseter meıirimniń mólsherin ózim bilemin. Ol on mınýt keshigip sý ishse, shólden ólip qalmaıtyn edi, balańdy emizip bolǵan soń julqynbaı, bulqynbaı baryp quıyp bere sal. Áıtpese ózi quıyp ishetindeı qylyp úıret. Dál osylaı kete bersek, bul balalar erteń ekeýmizdi de «qul» qylyp, degenimen júrgizetinine kózim anyq jetti. Qysqasy, sen meni qurmettetip balalardy tárbıeleýiń kerek eken. Balalarymyzdyń boıyna qoryqqannan emes, qurmettegennen syılaıtyndaı dán egip úlgerýimiz kerek eken. Erteń úlkeıgende kishkene kezinde qorqytyp basqarǵan amalyń júzege aspaı qalady. Sonda ne amal istemeksiń? Mine, alty jas! Keshiktik, sondada «eshten kesh jaqsy».
 

«Balam ákeńniń kıimin joǵary kóterip qoı!», «Balam, ákeńnen uıat bolmasyn!», «Ákeńniń aıaq kıimin durystap qoı!», «Ákeńdi tamaqqa shaqyr!», «Ákeńnen ruqsat sura!», «Ákeńdi shyǵaryp sal!», «Ákeń kele jatyr, úıdi jınastyryńdar!», «Ákeńniń mazasyn alma!» … Osyndaı sózderdiń bir kúnde kem degende bireýi aıtylyp turýy kerek jáne muny balaǵa istete bil. Al men «mamalaryńa rahmet aıtyńdar!», «mamalaryń renjip qalmasyn!», «mamalaryńa syılyq ápereıik!», «mamalaryńmen aqyldasyńdar!» degen sózderdi aıtyp turýym kerek. 
Oıyndaǵysy bolmaı qalsa jer tepkilep, jer tyrnap jylap, ekeýmizdi boqtap jatqan myna boqmuryn erteń basymyzdy qaı ońǵa qaratar deısiń?! Sen meni qazirden bastap ózińe qolqanat, balama «qul» qylmaı-aq qoı. Muny tyımasań erteń-aq sen de meniń qataryma qosylyp kelinimiz ben balamyz otyrǵan arbaǵa jegilgen qosar attaı qosaıaqtaıtynymyz anyq is. Aqyryp qalaıyn deseń, júrek qaby jarylyp kete me, túrtip qalaıyn deseń, qabattan sekirip kete me dep tiri kúıik tartýdan Qudaı saqtasyn!
 

Balany jumsap úıren. Aýylda ósken balamyz ǵoı, jumsalǵannan jaman bolǵan joqpyz. Baıaǵyda Jırenshege bireý «qolqanatyń bar ma?» degende at ústinde turǵan Jırenshe: «bar» – dep úsh jastaǵy balasyn kórsetipti. «Úıbaı-aý mynaý da qolqanat pa?» depti joldasy. Sonda Jırenshe jerge qamshysyn tastaı salyp, úsh jastaǵy balasyna: «Balam, qamshymdy alyp berip jibershi!» – depti. Balasy domalańdap kelip qamshyny jerden kóterip ákesiniń qolyna jetkizipti. Sonda Jırenshe: «Qolqanat degen osy emes pe?!» degen eken. Oǵan qaraǵanda odan eki ese jastaǵy bala sý quıyp ishe almaıdy degen ne sumdyq?
 

Baıaǵy demeı-aq qoıaıyn, óz ákemdi, óz aýylymdaǵy ákelerdi kórdim. Kedeıin de, baıyn da kórdim. Qonaqqa barsa da bala kóterip bezildep nemese shynashaqtaı balasyna, «Súıtesiń be? Búıtesiń be? Káne, mynany kórshi!» dep maımylsha bılep turatyn búgingideı ákelerdi kórgen emespin. Balasyna ákesin syılata alǵan áıel – naǵyz áıel! Ol áıeldiń basy balasynyń aldynda da, jarynyń aldynda da qadirli bolaryna kúmánińiz bolmasyn! Alladan alar syıy basqa áńgime.

Jazba Vkontakte áleýmettik jelisinen alynǵan