Qazaqstan musylmandary dinı basqarmasy meshitte týǵan kúnin ótkizgen Qaraqat Ábildınaǵa qatysty jaýap berdi, dep habarlaıdy "Qamshy" QMDB baspasóz qyzmetine silteme jasap.
- Jýyrda ánshi Qaraqat Ábildına tarapynan «Áziret Sultan» meshitiniń tómengi qabatynda ornalasqan meıramhanada qyz-kelinshektermen syrlasý keshin ótkizý týraly ótinish tústi. Nebary 30-dan astam áıel jamaǵaty jınalǵan kezdesýde Quran oqyldy, ýaǵyz-nasıhat aıtyldy, salt-dástúrge saı joralǵylar oryndalyp, ǵıbratty tolǵaý-termeler shyrqaldy.
Alaıda jıyn sońynda týǵan kúndi atap ótip, sharany ánshiniń estradalyq ánimen qorytyndylaý týraly kelisim bolmaǵan. Óıtkeni, mundaı úrdis – meshit ádebi men tártibine qaıshy. Bul másele uıymdastyrýshylarǵa túsindirilýde.
Aıta keter nárse, meshittiń tómengi qabatyndaǵy meıramhanada din men dástúrge saı rýhanı keshter men izgilikti is-sharalar, qudaıy astar, tilashar, balaǵa at qoıý, tusaýkeser syndy ulttyq merekelik rásimder uıymdastyrylyp turady.
Bir aıta keterligi, mundaı ıgilikti basqosýlardyń daýysy men dybysy negizgi qulshylyq zalyna estilmeıdi, - delingen habarlamada.
