Ústimizdegi jyldyń 22 naýryzynda «Qamshy» aqparattyq agenttiginiń betinde «Mańǵystaý oblysynda iri sheneýnik urylarmen sybaılas bolǵan» degen ataýmen maqala jarıalanǵan.
«Qamshy» erkin oı-pikir alańy bolǵandyqtan redaksıa poshtasyna hat joldap, másele kóteretinder az emes. Materıaldy jiberýshiler saıt poshtasyna aqparyn anonımdi túrde jibergen. Sondaı-aq materıalda naqty avtor kórsetilmegen. Kelgen hattyń Elbasy N.Nazarbaev, QR Bas prokýrory J.Asanov, QR Premer-mınıstri B.Saǵyntaevtyń, Qasymov pen Másimovtyń, Mańǵystaý oblysynyń jańa taǵaıyndalǵan ákimi, t.s.s. quzyretti bılik basyndaǵylardyń barlyǵynyń nazaryna jazylǵandyǵy jýrnalıske materıaldy jarıalaýǵa negiz bolǵan.
Alaıda, materıalda aty atalǵan sheneýnik Mańǵystaý oblystyq İİD ÁKB Jol júrisin baqylaý bólimshesiniń bastyǵy Erkin Degenıazov "Qamshy" aqparattyq agenttiginiń menshik ıesi «Qamshy Media» JSHS ústinen shaǵym túsirdi. Osyǵan baılanysty búgin, 7 sáýirde Almaty qalalyq Medeý aýdandyq sotta Degenıazovtyń shaǵymyn qaraǵan sot otyrysy ótti.
Sot sheshimine saı, «Qamshy Media» JSHS polısıa podpolkovnıgi Erkin Edilulynan ony qaralaıtyn negizsiz materıaldy jarıalaǵany úshin resmı túrde keshirim suraıdy.
Ári Erkin Edilulynyń talapker retinde sotta suraǵan tómendegi sharttarynyń oryndalǵanyn habarlaıdy.
- «Mańǵystaý oblysynda iri sheneýnik urylarmen sybaılas bolǵan» atty materıal saıt betinen alynyp tastaldy.
- Materıaldy anonımdi jiberýshiniń málimeti talapkerge berildi.
Túsindire ketetin bolsaq, daýǵa ózek bolǵan materıal saıt poshtasyna Naýryz merekesi kúni kelip, kezekshi jýrnalıs tarapynan baıqaýsyzda jarıalanyp ketken. Materıal jarıalana sala qoǵamda dúmpý týǵyzdy. Anonımdi aqpardy jarıalaǵan saıt ujymy Degenıazovtyń qyzmettik bedeline nuqsan keltirýdi kózdemegen. Alaıda, quzyrly oryndarǵa baǵyttalǵan materıal ishinde polısıa podpolkovnıgi Degenıazovty aıyptaý belgileri bar. Materıaldy jazylýshylar ony "urylarmen sybaılas" dep dálelsiz qaralaǵan. Sondyqtan da sotqa júgingen talapker Degenıazovtiń talap-aryzy boıynsha «Qamshy» aqparattyq agentti sot sheshimine kelisip, sot aldynda qateligin moıyndap talapkerdiń talabyn oryndady.
«Qamshy» aqparattyq agenttiniń Bas redaktory
Jazıra Baıdaly
