Qazaqstannyń Cyrtqy ister mınıstrligi Sırıa tóńiregindegi janjaldyń órsheýine "qatty alańdaıtynyn" bildirdi. Qazaqstan bıligi sırıalyq úkimet pen opozısıa kúshterin Jeneva jáne Astana kelissózderi barysynda qabyldanǵan bitim sharttaryn oryndaýǵa jáne kelissózderdi jalǵastyrýǵa shaqyrdy. Bul týraly Syrtqy ister mınıstrliginiń saıtynda arnaıy málimdeme ilindi.
7 sáýirde AQSH 59 qanatty zymyranmen Sırıadaǵy áýe bazasyn atqylady. Amerıkalyq bıliktiń málimdeýinshe, Han-SHeıhýn qalasyna tastalǵan hımıalyq qarý dál osy áýe bazasynda daıyndalǵan. AQSH áreketin Germanıa, Fransıa jáne Ulybrıtanıa qoldady. Sırıalyq opozısıa da bul shabýyldy jón kórdi.
"Qazaqstan Respýblıkasynyń Syrtqy ister mınıstrligi Sırıadaǵy shıelenistiń órshýine oraı asa alańdýashylyǵyn bildiredi.
Qazaqstan jappaı qyryp-joıý qarýynyń kez-kelgen qoldanýyn amoraldy, adamgershilikke jat jáne adamshylyq qaǵıdattaryna qaıshy áreket retinde úzildi-kesildi aıyptaıdy. Bul fakti boıynsha kinálilerdi jaýapqa tartý úshin BUU aıasynda halyqaralyq jan-jaqty obektıvti jáne ádil tergeý júrgizýdi qaǵıdatty túrde mańyzdy dep sanaımyz.
Qaqtyǵystyń odan ári órshýi jáne taraptar ustanymdarynyń qatańdanýy halyqaralyq qoǵamdastyqtyń terorıstik qaýipke qarsy kúres boıynsha buryn qol jetkizgen barlyq, onyń ishinde Jeneva jáne Astana prosesteri sheńberindegi ýaǵdalastyqtarǵa qaýip tóndiredi jáne Sırıa jerinde barlyǵyn qamtıtyn beıbitshilik pen kelisimge jetý perspektıvasyn alystatady.
Sırıa Arab Respýblıkasynyń Úkimeti men qarýly opozısıalyq toptar arasynda 2016 jylǵy 30 jeltoqsanda kúshine engen soǵys áreketterin doǵarý rejımin saqtaýdyń jáne nyǵaıtýdyń mańyzdylyǵyn atap ótemiz. Astana prosesiniń kepildik berýshi elderin shıelenistiń odan ári órshýiniń aldyn alý úshin ózderiniń bar kúsh-jigerlerin jumsaýǵa shaqyramyz.
Qazaqstan sırıaaralyq qaqtyǵysty tek beıbit jolmen, dıalog jáne tatýlasý arqyly sheshý múmkin degen ustanymyna berik jáne barlyq múddeli taraptardyń qatysýymen Astana prosesi sheńberinde Sırıa úkimeti men opozısıalyq toptar arasynda tatýlasýdy saqtaý boıynsha tikeleı kelissózderdi jalǵastyrýǵa shaqyrady", - delingen SİM málimdemesinde.
Bıyl Astanada Sırıadaǵy janjaldy retteýge arnalǵan kelissózderdiń birneshe raýndy ótti. Oǵan Reseı, Túrkıa jáne Iran delegasıalary qatysty. Jeneva qalasynda da BUU bastamasymen jekelegen kelissózder júrip jatyr.
Sırıalyq bıliktiń málimeti boıynsha, 7 sáýirde Sırıadaǵy áýe bazasyn shabýyldaý kezinde alty ásker qyzmetkeri men toǵyz beıbit turǵyn qaza tapqan.
