Úndsitannyń Jamma men Kashmır shtatynda saılaý kezinde tártipsizdikter oryn alyp, 8 adam kóz jumdy, 150 adam jaraqattandy dep habarlaıdy «Qamshy» aqparattyq agenttigi Times of India-ǵa silteme jasap. Jaraqattanǵandardyń arasynda narazylyq sharalaryn ótkizgender de, tártip saqshylary da bar.

Aıta keteıik, qarsylyq aksıasy parlamenttiń tómengi palatasyna saılaýǵa bir kún qalǵanda ótken. Jeksenbi kúni saılaý okrýginde tártip saqshylary men Býdgam jáne Shrınagar qalashyǵyndaǵy túrli aýdandarda narazylyq bildirgender kóp boldy. Olar daýys berýge arnalǵan elektrondy mashınalardy syndyrǵan.

Qarsylyq aksıasyn ótkizgen separatıster adamdardyń kóz jumǵanyna qaramastan óz jaqtastaryn narazylyq aksıasyn jalǵastyrýǵa shaqyrdy. Saldarynan jeksenbi kúni ótken saılaýǵa óte az adam kelgen. Bul sońǵy 30 jyldaǵy eń tómengi kórsetkish. Nebári 7% adam daýys berýge kelgen. Endi shtatta sársenbi kúni Anantnag óńirinde taǵy saılaý bolady.

Úndistannyń basqa da shtattaryndaǵy qosymsha saılaý janjalsyz ótpedi. Onda kóz jumǵandar bolmady. Alaıda, jaraqattanǵandar bar.