37 jastaǵy halyqaralyq deńgeıdegi Ferǵana oblysy Rıshtan aýdanynyń týmasy Sherzod Madamınov esimdi aspazshy 1 sáýir kúni «qabyldaý bólimine» kelip bılik tulǵalary otyratyn jerden jumys berýin surap kelgen bolatyn. Aspazshynyń aıtýynsha, oblys ákimi Shýhrat Ǵanıev ony jurttyń kózinshe saqal ósirgeni úshin aıyptap, kúlki qylǵan, dep habarlaıdy centralasian.org. Málimettiń qazaqsha nusqasyn «Qamshy» aqparattyq agenttigi oqyrman nazaryna usynady.

Sherzod Madamınov birneshe jyldar boıy Reseıdiń túrli meıramhanalarynda jumys istep, óziniń aspazdyq ónerin damytqan. Sonymen qatar RF prezıdenti Vladımır Pýtınniń qatysýymen ótken túrli resmı is-sharalarǵa as ázirlegen. Alaıda, Ózbekstanǵa oralǵannan soń jumyssyz qalyp otyr.

«1 sáýir kúni «qabyldaı bólmesine» barǵanymda Rıshtan aýdanyndaǵy dámhanalarǵa shaqyrtý aldym. Degenmen, men bılik ókilderiniń as úıinen jumys tapqym kelip edi», - deıdi Sherzod Madamınov.

Onyń aıtýynsha, «halyqty qabyldaý bólmesiniń» ókili oǵan nesıe alyp, jeke kásibin ashýǵa keńes beripti.

«Men qatty qýanyp kettim. Alaıda, kenetten Ferǵana oblysynyń ákimi Shýhrat Ǵanıev ornynan turyp keldi de, meniń qasyma jaqyndap kelip: «Mynaý ne?» dep surady. Meniń saqalym jaıly surap jatqandyǵyn birden ańǵardym da, «bul – espananolka» dep jaýap berdim. Menen ekinshi qaıtara suraǵanynda, qaıtadan solaı jaýap berdim. Sosyn ol jurttyq kózinshe maǵan: «Saqaldaryńda qyryp, biz sekildi durystalyp, adam sıaqty bolyp kelgennen soń nesıe alasyńdar» dep aıtty. Qatty ashýlanyp kettim de, syrtqa shyqtym», - dep málimdedi Sherzod Madamınov.

Aspazshynyń aıtýynsha, oblys ákiminiń sózderinen keıin óziniń týǵan aýdany Rıshtan turǵyndary ony mazaqtaı bastaǵan.

«Men barǵan kúni qabyldaý bóliminde adamdar kóp bolatyn. Endi adamdar meni kórgen kezde betime qarap kúledi de, «Áli kúnge deıin deni durys adam bolmaǵansyz ba?» dep aıtady. Men oblys ákiminiń ústinen sotqa aryz jazbaq bolyp edim, alaıda oǵan qarsy shyqqysy keletin birde-bir advokat taba almadym. Men álemniń kóp jerlerinde jumys istegenmin, alaıda eshbir jerde meni dál bulaı qorlaǵan emes», - dep shaǵymdandy Sherzod Madamınov.

Aýdarǵan: Nazerke Labıhan