Uranymyz Alash bolatyn, Alash dese attanýǵa daıyn turatyn edik... Bıyl Alash Ordaǵa 100 jyl tolyp otyr. Isi qazaq úshin alashshyl azamattardyń orny bólek ekenin túsindirýdiń qajeti joq. Sol sebepti de «Qamshy» aqparattyq agenttigi memlekettik, ulttyq mańyzǵa ıe Alash qozǵalysynyń mereıtoıyn joǵary deńgeıde atap ótýdi josparlaǵan bolatyn. Konferensıa, dóńgelek stol degennen, bylaısha aıtqanda aýyz jybyrlatýdan jurt sharshaǵandyqtan naqty iske kóship, sonyń ózinde qur toılap, mal shashpaı, halyqqa paıdaly bolsyn degen nıetpen negizgi 5 is-sharany ótkizýdi uıǵarǵan edik: Alash azamattary rýhyna quran baǵyshtap as berý; 100 aǵash egý; 100 jetim balany kıindirip, oıynshyq jáne oqý quralymen qamtamasyz etý; 100 stýdentke stıpendıa taǵaıyndaý; Alash murasyn zerttegen 10 qaıratkerge merekelik medal tabystap, syı-qurmet kórsetý;
Qazaq tildi BAQ-qa jar salyp, Ahańnyń murajaı-úıiniń aldyna kıiz úıler tigip, án aıtyp, jyr oqyp, Alash azamattaryn eske salyp, olardyń rýhyna arnap quran baǵyshtap, as berdik. 500 adamnyń basyn qosqan asqa Alashtanýshy Mámbet Qoıgeldi «Mundaı as buryn-sońdy berilmegen edi» dep rızashylyǵyn bildirdi. Bárin aıt ta birin aıt, jaqsylardyń basyn qosyp, qazaqtyń eńsesin kóterip, asty respýblıkalyq deńgeıde uıymdastyra alǵanymyzben Alash qurmetine 100 aǵash otyrǵyzýǵa kelgende saıabyrsyp qaldyq. İsimizdi maquldap, ıyǵymyzdan qaqqandar kóp bolǵanymen naqty is-áreket jasaýǵa kelgende kóbisi úndemestik tanytty. 100 aǵash otyrǵyzamyn degen «Qamshyǵa» qala ákimdigi jer telimin de berdi. Almaty qalasyndaǵy Baıtursynov pen Jambyl kósheleriniń qıylysynda ornalasqan Baıtursynov saıabaǵynyń aýmaǵynda aǵash otyrǵýzyǵa ruqsat aldyq. Qala ishinde jemis-jıdek aǵashyn otyrǵyzýǵa ruqsat etilmegendikten tańdaýymyz «kúl aǵashyna(Iasen)» tústi. Bylaısha aıtqanda, bári daıyn. Atadan mal qalǵansha, tal qalsyn demeýshi me edi, 100 aǵash egilgen jerdiń «Alash aleıasyna» aınalǵanyn qalaıtyn qazaqtyń sany az bolyp shyqty. Ókinishimizge qaraı. «100 aǵash otyrǵyzýǵa tizimdelý bastaldy» degende elýden astam adam qoldaý kórsetip, atoı salyp, maqala astynda «qoldaımyn, otyrǵyzamyn» dep pikir qaldyrǵanymen, elýdiń tek saýsaqpen sanarlyǵy ǵana kórsetilgen esepshotqa aǵashtyń aqshasyn (bir aǵashtyń quny 10 000 tg.) aýdardy. Naýryzdyń sońy men sáýirdiń basynda aǵash egemiz degen josparymyzdyń joǵarydaǵy sebepke baılanysty kesheýildedi. Budan artyq kúte almaǵandyqtan táýekelge bel býyp, 15 sáýir kúni Almaty qalasynda «Alash aleıasyn» otyrǵyzbaqshymyz.
Feısbýkte otyrǵan qazaq syrt kózge namysshyl, ultjandy bolyp kórinedi. Qazaqty qaıraıtyn jalyndy jazbalar jazatyn feısbýkshil azamattar da jeterlik. Birer saǵatta ǵalamtor betin sharlap ketetin myna maqala feısbýkte de kórinbeı qalmasy anyq. Endeshe feısbýktiń belsendi 10 000 qoldanýshysy arasynan 100 alashshyl azamat shyqpaýy múmkin emes. Sóz súıeginen ótetin qazaq «Alash úshin aǵash otyrǵyzatyn qazaq tabylmady» degen synǵa shydaı almaı, qolyna kúrek alyp, aǵash egýge bilek sybana keledi degen úmittemiz. 1000 sóz emes, qaıtalap aıtaıyq, artymyzdan 1 aǵash qalsyn degen aǵaıyndy qamshygerler 15 sáýir kúni tańǵy saǵat 09:00-de Almatydaǵy Baıtursynov saıabaǵynda kútedi. 10 000 teńgeńizdi beısenbi kúnge ıaǵnı sáýirdiń 13-ne deıin myna esepshot nómirine aýdaryp, bizben baılanysqa túsýińiz qajet.
«Center credit» banki
4667 2048 4780 1804
JSN: 960124400773 (Dilbar Qadyrqul)
Soma: 10 000 tg.
Barlyq suraq boıynsha: 87017235500
Bas redaktor: Jazıra Baıdaly
