Almaty kóshelerinde balasyn kóterip, qaıyr tilep júretin áıelderdi jıi baıqaýǵa bolady. Kópshilik olardyń qaıdan kelgenin, qaı ulttan ekenin bilmeıdi, dep habarlaıdy "Qamshy" aqparattyq agenttigi Nur.kz portalyna silteme jasap.
"Bizde jurt joq, ár jerde osylaı júremiz. Syǵandar olar "rýsskııler", biz - musylman, lolylarmyz. Bizdiń arǵy atalarymyz Lo degen jigit pen Ly degen qyz bolǵan, olar týys bola tura, úılenip qoıypty. Sodan bizdiń úlkenderimiz olardy qarǵap, "loly" dep atap ketken. Elden qýylǵan soń, olar qol jaıyp, qaıyr tilep kún kóredi", - deıdi kelinshek.
Maný bizben qazaq tilinde erkin sóılesti. Qolynda alty aılyq balasyn kóterip, Almatyda júrgenine eki jarym jyldan asypty. Bular syǵandardyń shyǵystaǵy bir tarmaǵy, ózderin musylman sanaıdy. Kelinshektiń aıtýynsha, ol kózin ashqaly qaıyr tileýmen aınalysady eken.
"Biz oqymaımyz, kıinbeımiz, qydyrmaımyz. Qaıyr suramasaq bolmaıdy, aýyramyz. Kúıeýim "stroıkada" isteıdi, qyzym men ulym «Salamat» bazary jaqta júr. Ózim Arbatta qaıyr tileımin. Almatyda aqsha kóp, adamdary "dobryı". Ótken jyly Astanada bolǵanbyz, ol jaqta aqsha az, adamdary da jaman", - deıdi qaıyr tileıtin kelinshek.
Manýdyń aıtýynsha, Almatyda kún saıynǵy tabysy keminde 1500-2000 teńgeni quraıdy. Al juma kúnderi on myńǵa deıin tabys tabatyn kezderi bolady eken. Kún saıyn tańǵy saǵat jetide jol tosatyn kelinshek balasyn arqalap, úıine tún bata barady.
"Tańǵy beste turamyz, namazdan keıin kóshege ketemiz. Keshke úıde jınalamyz. Qysta "kvartır" jaldaımyz, jazda palatkada jatamyz. "Kvartırymyz" Darhan aýylynda. Aqsha jetpeıdi, balamnyń pampersi bar, tamaǵymyz bar. Onyń ústinde kóshede qaıyr tilegenimiz úshin "arenda" tóleımiz", - deıdi Maný.
Iá, Almaty kóshelerinde tynysh qana qaıyr suraý úshin olar ózderine bas-kóz bolyp otyrǵan adamdarǵa kúndik tabysynyń bir mólsherin berip otyrady. Bastyqtaryn ózderi de kórmegen, tek keshke bir jigit kelip, aqsha jınap ketedi eken.
Aıta keterligi, Manýdy áńgimege tartqanymyz úshin aqsha tóleýge týra keldi. Manýdyń Tájikstanda óz úıi bar. Ol Almatyda aqsha úshin júrgenin, biraz jyldan soń eline qaıtatynyn aıtty.
