Elimizde ótetin Halyqaralyq «Ekspo –2017» kórmesiniń aıasynda M.Áýezov atyndaǵy Qazaq Memlekettik akademıalyq drama teatry 21 maýsym kúni «Kómbe nannyń dámi» dramasyn sahnalaıdy dep habarlaıdy "Qamshy" aqparattyq agenttigi M.Áýezov atyndaǵy Qazaq Memlekettik akademıalyq drama teatrynyń
"baspasózben jumys jasaý" bólimine silteme jasaı otyryp.
Tarıhı jaǵdaılardyń saldarynan Qazaqstanǵa jer aýdarylǵan túrli ult ókilderiniń taǵdyry sýretteletin dramatýrg Mádına Omarovanyń «Kómbe nannyń dámi» dramasy M.Áýezov atyndaǵy Qazaq Memlekettik akademıalyq drama teatrynyń sahnasynda «Teatr kóktemi – 2017» festıvaliniń aıasynda tusaýy kesilip, kórermenge jol tartqan bolatyn. Buǵan deıin jazýshynyń «Aqtastaǵy Ahıko» dramasy Asqat Maemırovtyń rejıserlik sheshimimen atalmysh teatrda sahnalanǵan. Ekinshi shyǵarmashylyq jumysynda da tarıhı taqyrypqa júgingen dramatýrgtyń bul shyǵarmasy, ózindik kórkem sheshimder men keıipkerler harakterin ashýdaǵy izdenisterimen erekshelendi. Qoıylymǵa rejıssýra talaptaryna saı kórik qosqan Alma Kákisheva, al tyń senografıalyq sheshim kórsetken sýretshi Esengeldi Tuıaqov boldy. Alma Kákisheva kásibı sahna ónerine aktrısa retinde aıaq basyp, 2003 jyldan beri rejıserlik qyzmet atqaryp júr. Tyrnaqaldy jumysy – «Kóshkin» spektakli (avt.T.Jújenoǵly, aýd. O.Qyıqymov). Ol bas teatrda «Júz jyldyq mahabbat» (avt.D.Isabekov), «Tańsulý» (avt.Ǵ.Esim), «Apaly-sińlili úsheý» (avt.A.Chehov, aýd.Á.Bópejanova), «Imperıadaǵy kesh» (avt.S.Asylbekuly), «Almas qylysh» (avt.İ.Esenberlın, ıns.Á.Baǵdat) syndy týyndylardy sahnalady.
Kezekti jumysy «Kómbe nannyń dáminde» surapyl soǵys jyldary Qazaqstanǵa qonys aýdarylǵan ult pen ulystardyń kúndelikti ómiri men qazaq halqynyń qonaqjaılylyǵy sýrettelip, olar bastan keshirgen qıyndyqtar arqyly oqıǵa jalǵasyn taýyp, ary qaraı órbıdi. Keńes ókimetiniń solaqaı saıasaty tusynda jer aýdarylǵan halyqty syrtqa teppeı, baýyrmaldylyq pen adamgershilik, meıirimdilik pen qamqorlyq tanytqan qazaq halqynyń ıgi isteri áspetteletin qoıylym, kórkemdik tutastyqta sheshilgen. Pesada da, qoıylymda da basty qaharman – halyq. Bir ǵana aýylda bolyp jatqan jaǵdaı búkil respýblıkany qamtyp, oıyn balalarynyń minez-qulqyna da áser etken.
Senografıalyq sheshim men akterlar keskindegen sheber beıneler, mýzykalyq kórkemdeý men kásibı rejıssýra úılesim tapqan qoıylymnyń kótergen taqyryby qashan da ózekti, qashan da ótkir.
Gúlzıa Sádýaqas
