Germanıanyń Dortmýnd qalasynda fýtbolshylar mingen avtobýs janynda úsh birdeı jarylys boldy, dep habarlaıdy "Qamshy" aqparattyq agenttigi Habar 24 arnasyna silteme jasap.

Jergilikti arnalardyń habarlaýynsha, oqys oqıǵadan dortmýndtyq «Borýssıa» komandasynyń ortalyq qorǵaýshysy Mark Bartra aýyr jaraqat alǵan. Oǵan shuǵyl operasıa jasaldy. Germanıadaǵy menshikti tilshimiz Sholpan Naımanbaevanyń habarlaýynsha, jarylys avtobýs stadıonǵa bara jatqan jolda bolǵan. Ol jerde dortmýndyq «Borýssıa» men fransýzdyq «Monako» komandalary arasynda oıyn ótýi tıis edi. Tosyn jaǵdaıǵa baılanysty mach keıinge qaldyrylyp, jankúıerlerge dereý úılerine qaıtýǵa keńes berildi. Polısıa ókilderi qastandyqtyń fýtbolshylarǵa baǵyttalǵanyn aıtyp otyr. Sonymen qatar, oqıǵa ornynan sálemdeme hat tabylǵan. Biraq onyń mátini ázirge jarıalanbady. Aıta keteıik, tártip saqshylary jarylysty terrorlyq shabýyl retinde qarastyryp otyrǵan joq.

Gregor Lange, Dortmýnd qalasynyń polısıa basshysy:

- Tártip saqshylary arnaıy operasıaǵa jumyldyryldy. Sarapshylar jarylǵyshtyń neden jáne qalaı jasalǵanyn anyqtap jatyr. Ázirge shabýyldy kimniń jasaǵany belgisiz. Sondyqtan oqıǵany jan-jaqty qarastyryp, barlyq jaǵdaıǵa saqadaı saı otyrmyz.