Respýblıkamyzdyń memlekettik arhıvteri – ulttyq jady saqtaýshysy, aqparattyq qoǵamda mańyzdy rólge ıe qundy aqparattyq resýrs. Sondyqtan, bul aqparatqa qol jetkizý memlekettiń mańyzdy strategıalyq mindeti bolyp tabylady dep jazady "Qamshy" aqparattyq agenttigi QR MSM baspasóz qyzmetine silteme jasap.
Qazaqstandyq arhıvterdiń damýy, mindetteri men qyzmeti jóninde Ortalyq komýnıkasıalar qyzmetinde Qazaqstan Respýblıkasy Mádenıet jáne sport mınıstrliginiń arhıvtik is jáne qujattama departamentiniń dırektory Álıa Mustafına, Qazaqstan Respýblıkasynyń Ortalyq memlekettik muraǵatynyń dırektory Aqtaeva Lázzat, Qazaqstan Respýblıkasy Ortalyq memlekettik kınofotoqujattar jáne dybys jazbalar arhıviniń dırektory Alla Seıtova, Qazaqstan Respýblıkasynyń Ulttyq arhıviniń dırektory Jangeldi Maqashov áńgimeledi.
OKQ ótken brıfıńte Álıa Mustafına atap ótkendeı, qazirgi tańda memlekettik arhıvterdiń biryńǵaı júıesinde 7 respýblıkalyq jáne 207 aımaqtyq memlekettik arhıvtik mekemeler qamtylǵan. Táýelsizdik jyldarynan beri Qazaqstannyń Ulttyq arhıviniń qory men qujattary 7,08 mln.-nan 23,3 mln. birlikke deıin ósti. Ortasha eseppen, jyl saıyn memlekettik arhıvter 400 myńnan asa ister men qujattardy saqtaýǵa qabyldaýda. Arhıvtik qujattardy ýaqytsha saqtaýdy júzege asyratyn uıymdarmen turaqty túrde jumys júrgizilýde, búginde olardyń sany 15 myńnan asady.
«Memlekettik arhıvter jyl saıyn áleýmettik-quqyqtyq sıpattaǵy 300 myńnan asa ótinishti, 32 myń taqyryptyq jáne genealogıalyq ótinishti oryndaıdy» - dep atap ótti A. Mustafına.
Qazaqstan arhıvterinde memleketimizdiń tarıhy tóńiregindegi túrli daqpyrttar men burmalaýdyń aldyn alýǵa múmkindik beretin biregeı materıaldar jınaqtalǵan. Qazirgi tańda qujattar túpnusqasymen oqyrmandar zaldarynda, qujattamalyq kórmelerde tanysýǵa múmkindik bar, sońǵy bes jylda 200 arhıvtik qujattardyń jınaqtary jaryq kórdi.
Sondaı-aq, respýblıkamyzdyń memlekettik arhıvteri qujattamalyq materıaldardy sandyq formatqa aýdarý boıynsha aýqymdy jumystar júrgizýde. Barlyǵy 200 myńnan asa saqtalǵan birlikter sandyq formatqa ótti, bul shamamen 23 mln. paraqtar. Bul saladaǵy kóshbasshy uıym Qazaqstan Respýblıkasy Ortalyq memlekettik kınofotoqujattar jáne dybys jazbalar arhıvi bolyp tabylady. Uıymda 56 myńnan asa foto jáne fonoqujattarǵa elektrondyq formatta qol jetkizýge bolady (arhıvtik qordyń aýdıovızýaldyq qujattarynyń elektrondyq bazasy arhıv saıtynda)
Brıfıńte aıtylyp ótkendeı, aǵymdaǵy jyly «Elektrondyq qujattar qoımasy» servıstik baǵdarlamalyq ónimin júzege asyrý boıynsha jumystar bastaldy. Ol arhıvterdi elektrondyq Úkimet júıesine memlekettik tetik elementteriniń biri retinde endirý maqsatynda elektrondyq qujattardy elektrondyq qujat aınalys júıesinen uıymnyń vedomstvalyq arhıvine ótkizý barysyn tolyq avtomattandyrylýyn qamtamasyz etedi.
Tarıhı estelikterdi saqtap, turaqty túrde tolyqtyryp otyratyn arhıvter qazirgi ǵana emes, bolashaq qazaqstandyq urpaqqa qyzmet etedi. Uzaqmerzimdi saqtaýdyń basty maqsaty Ulttyq arhıv qoryn zamanaýı talaptarǵa jaýap beretin aqparattyq júıege aınaldyrý zańdy qubylys. Atalmysh kezeńdegi basym baǵyt Qazaqstan Respýblıkasynda qurylatyn biryńǵaı aqparattyq keńistik talaptaryna jaýap bere alatyn arhıvtik aqparattyq tehnologıalar arqyly aqparatty jınaqtaý, óńdeý, saqtaý, izdeý jáne tapsyrý prosesterin avtomattandyrý bolyp tabylady.
