Astananyń ulttyq akademıalyq kitaphanasynda QR Mádenıet jáne sport mınıstrliginiń uıymdastyrýmen Elbasy N.Á. Nazarbaevtyń «Bolashaqqa baǵdar: rýhanı jańǵyrý» atty maqalasyn talqylaýǵa arnalǵan alqaly jıyn ótt dep habarlaıdy "Qamshy" aqparattyq agenttigi. Basqosýǵa tóraǵalyq jasaǵan mınıstrlik janyndaǵy qoǵamdyq keńes tóraǵasy Myrzataı Joldasbekov «Elbasy kóterip otyrǵan másele – búgingi qoǵamymyz úshin aýadaı qajet máselelerdiń biri. Ótken salt-sanamyzdan patshaly Reseı men keńestik ıdeologıanyń buǵaýynda qalyp qol úzgen, keńes dáýiriniń kúni ótkenimen, sandaǵan jyldar boıy kúshtep tańylǵan saıasattyń saldarynan ornyqqan quldyq psıhologıamen at quıryǵyn kesise almaı júrgen el-jurtymyz búginde ári-sári hálde ekeni de shyndyq. Keı jastarymyzdyń batystyń jyltyryna eliktep, qazaqy ar-uıattan alshaqtaýy, al endi biriniń ultymyzda bolmaǵan, ata-babamyzdyń ustanymyna múldem kereǵar aǵymdarǵa ilesýi ulttyq sanadaǵy aqtańdaqtardyń saldary» deı kele, óz oılaryn ortaǵa salý úshin, Ǵarıfolla Esim, Namazaly Omashev, Ǵalym Ahmedárov, Asqat Maıemırov, Kópen Ámirbek jáne basqalar maqalanyń ózegi kókeıdegini dóp basatynyn aıtyp, «Halqymyzdyń tamyry tarıhynyń tereńinen bastaý alatyn rýhanı kody bolady... Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı. Biraq, ulttyq kodymdy saqtaımyn dep boıyńdaǵy jaqsy men jamannyń bárin, ıaǵnı bolashaqqa senimdi nyǵaıtyp, alǵa bastaıtyn qasıetterdi de, kejegesi keri tartyp turatyn, aıaqtan shalatyn ádetterdi de ulttyq sananyń aıasynda súrlep qoıýǵa bolmaıtyny aıdan anyq» - dep taıǵa tańba basqandaı, soqyrdyń qolyna taıaq ustatqandaı etip aıtqan pikirin kókirek kózi ashyq adam qoldaý kerek ekendigin, sonymen qatar maqalada aıtylǵan jershildik dertine qosa, etekten tartyp otyrǵan rýshyldyq dertinen de óskeleń urpaqty ada etý kerek ekendigi keńinen áńgime boldy.
Tutas qoǵamnyń jáne árbir qazaqstandyqtyń sanasyn jańǵyrtýdyń Elbasy usynyp otyrǵan qaı baǵyty bolmasyn eldiń rýhanı álemin baıytatyn baǵyttar. Básekelik qabilet, Pragmatızm, Ulttyq biregeılikti saqtaý, Bilimniń saltanat qurýy, Qazaqstannyń revolúsıalyq emes, evolúsıalyq damýy, Sananyń ashyqtyǵy – rýhanı jáne ekonomıkalyq jaǵynan órleımin degen qoǵam úshin aýadaı qajet qabiletter men qasıetter bolyp tabylady.
Taıaý jyldardaǵy mindetter retinde usynylyp otyrǵan latyn álipbıine kóshý, qoǵamdyq jáne gýmanıtarlyq ǵylymdardy jetildirý, týǵan elge – Qazaqstanǵa degen patrıottyq sezimdi qalyptastyrý baǵytynda atqarylatyn issharalardy memlekettiń mindeti retinde usyný Elbasynyń ult kósemi ekendigin jáne bir márte baıqatady.
Ultyn súıip, ult taǵdyryn óz taǵdyrymen baılanystyratyn júregi izgilikke toly árbir azamat bul mindetterdi qýana qabyldap, onyń atqarylý barysyna jumyla kirisedi degen oıdamyz.
