12 sáýirde Qazaqstan Respýblıkasynyń Energetıka mınıstri Qanat Bozymbaev Shymkent munaı óńdeý zaýytyna jumys saparymen keldi. Mınıstr Shymkent munaı óńdeý zaýytyn jańǵyrtý jobasynyń birinshi kezeńiniń nysandaryn, sondaı-aq ekinshi kezeńi nysandarynyń qurylys alańdaryn kórip, aralap shyqty dep habarlaıdy "Qamshy" aqparattyq agenttigi QR Energetıka mınıstrligi men «QMG-ÓM» AQ baspasóz qyzmetine silteme jasap.
«QazMunaıGaz» AQ-nyń basshylyǵy mınıstrge jobanyń birinshi kezeńi boıynsha jumystardyń mehanıkalyq aıaqtalǵany jáne ekinshi kezeń nysandarynda qurylys-montajdaý jumystaryn júrgizý kestesi týraly baıandady.
Zaýytty aralap shyqqannan keıin Q. Bozymbaev jańǵyrtý jobasyn teziraq aıaqtap, Qazaqstan úshin joǵary klasty avtomobıl otynynyń qajetti kólemin alý úshin jumystardy qarqyndy júrgizýdiń mańyzdylyǵyn atap ótti.
Esterińizge sala ketsek, 31 naýryzda Shymkent munaı óńdeý zaýytynda zaýytty jańǵyrtý jobasynyń birinshi kezeńiniń iri tehnologıalyq nysany bolyp tabylatyn – shıkizatty aldyn ala gıdrotazalaıtyn blogy bar jeńil benzın fraksıalaryn ızomerleý qondyrǵysynda qurylys-montajdaý jumystarynyń mehanıkalyq aıaqtalǵany týraly aktige qol qoıylǵan bolatyn.
Qazirgi ýaqytta, atalǵan nysanda iske qosý-retteý jumystary júrgizilip jatyr jáne ol jumystardy aǵymdaǵy jyldyń shildesine aıaqtaý josparlanǵan. Nysan iske qosylǵannan keıin kepildi paıdalaný kórsetkishterine qol jetkizilip, 2017 jyly K4, K5 ekologıalyq klastaǵy (Evro-4, Evro-5 analogy) joǵary oktandy benzınder men dızel otyny alynatyn bolady jáne joǵary oktandy benzınderdi óndirý jylyna 460 myń tonnaǵa, dızel otynyn óndirý jylyna 226 myń tonnaǵa, avıaotyndy óndirý jylyna 27 myń tonnaǵa artatyn bolady.
Buǵan qosa, Shymkent munaı óńdeý zaýytynda jańǵyrtý jobasynyń ekinshi kezeńiniń aıasyndaǵy jumystar da qarqyndy júrgizilýde. Jobanyń ekinshi kezeńi zaýyttyń shıkizat óńdeý qýatyn jylyna 5,25 mln. tonnadan 6 mln. tonnaǵa deıin arttyrýǵa jáne shıkizatty óńdeý tereńdigin joǵarylatýǵa baǵyttalǵan. Jobanyń ekinshi kezeńi tehnologıalyq turǵydan kúrdeli bolyp keledi jáne joǵary oktandy motorly otyndardy alatyn, qýaty jylyna 2,0 mln. tonna munaıdy tereń óńdeıtin katalıtıkalyq krekıng qondyrǵysy keshenin salýdy qarastyrady.
Jobanyń ekinshi kezeńi aıaqtalǵanda zaýytta joǵary oktandy benzınderdi óndirý jylyna 2 270 myń tonnaǵa deıin, dızel otynyn óndirý jylyna 1 916 myń tonnaǵa deıin, avıaotyndy óndirý jylyna 400 myń tonnaǵa deıin, al zaýyt ónimderiniń QR naryǵyndaǵy úlesi 35%-ǵa deıin artatyn bolady.
Jalpy Shymkent munaı óńdeý zaýytyn jańǵyrtý jobasy boıynsha 11 tehnologıalyq qondyrǵylardy jáne jalpy zaýyt sharýashylyǵynyń 29 nysanyn salý jáne rekonstrýksıalaý qarastyrylǵan.
Joba boıynsha bas merdiger jumystaryn munaıgaz ónerkásibi salasynda ınjınırıńtik jáne qurylys jumystarymen aınalysatyn iri kompanıalardyń biri – SRESS (China Petroleum Engineering & Construction Corporation) kompanıasy oryndaýda.
Jumys saparynyń nátıjesi boıynsha energetıka mınıstri Q. Bozymbaev Shymkent munaı óńdeý zaýytynyń basshylyǵyna jańǵyrtý jobasy boıynsha ári qaraı júrgiziletin jumystarǵa qatysty birqatar tapsyrmalar berdi.
