60 jastaǵy Iýrıı Tyrlovty bireýler osynshama ýaqyt jumysqa jegýmen kelipti, dep jazady Qamshy AA. Tek qolyna kúrek ustaı almaıtyn halge jetkende, álgi qojaıyndary ony bostandyqqa jibergen kórinedi. Eski meken-jaı boıynsha úıine tartqan jarymjan azamat, baspanasyn da ornynan tappaı qalǵan. Qujaty da, jaqyndary da joq ol qazir aýrýhanada jatyr.

KTK arnasynyń habarlaýynsha, oǵan jumys usynyp, shalǵaıdaǵy aýylǵa alyp ketken. Ol jerdi ózi Jambyl oblysynyń Qordaı aýdany dep otyr. Sodan beri Iýrııdiń kórmegen qorlyǵy qalmapty.

 «Bárin istedim. Qoılardy baqtym, tamaqtandyrdym, tazaladym, aıtqandarynyń bárin istedim», deıdi Iýrıı Tyrlov tilshige bergen suhbatynda.

Osylaı jyldar boıy jumysqa jegilgen. Tek densaýlyǵynan aıyrylyp, eńbekke jaramsyz kúıge jetkende ǵana, qojaıyndary Almatyǵa ákelip tastapty. Al 17 jyl boıǵy jumysy úshin qolyna ustatqandary – myń teńge ǵana. Onsyz da azaptan áreń qutylǵan Iýrıı Tyrlov munda kelgende de qıyndyqqa tap bolǵan.

Iýrıı Tyrlov: «Qaıtyp kelsem, úıim joq. Meniń jerime balabaqsha salyp tastaǵan».

Endi Iýrııdiń qujaty da, jaqyndary da joq. Al densaýlyǵy sál de bolsa túzelipti. Munda ol jedel járdemmen ólimshi kúıinde jetkizilgen eken.

Er adamnyń qazirgi jaǵdaıyna qatysty nevrolog Kúlásh Babaeva bylaı deıdi:

- Kelgen kezde esin durys bilmeıtin. Muryny jarylǵan. Beti qan. Kóp nárseni aıta almaıtyn.  Ol kiside sol jaǵyndaǵy qol men aıaǵy sal bolyp qalǵan. Tili kúrmeledi.

Qazir palatadaǵy ózge naýqastar kerek-jaraǵyn alyp, oǵan barynsha kómektesýde. Iýrıı de tek solarǵa muńyn shaǵypty.

Almaty qalasynyń turǵyndarynyń aıtýynsha, er adamnyń eresek balalary bar, ony solar urǵan kórinedi. Al, sheshesi Qytaıdan kelgen eken. Iýrııge adamdardan góri qoılar joldas bolǵan.

Endi sanaýly kúnderden keıin qarıa bul jerden shyǵarylady. Biraq, barar jeri bolmaǵandyqtan, dárigerler ony medbıkelik kútim aýrýhanasyna jibermek. Onda da tek 10 kúndeı panalaı alady.

Sondyqtan, dárigerler qazir quzyrly oryndarmen birigip, Iýrıı Tyrlovtyń jaqyndaryn izdep jatyr. Qorlyq kórgen azamattyń ózi sotqa shaǵymdanbaq. Sóıtip, quldyqqa jekkenderdiń jazaǵa tartylǵanyn qalaıdy. Al olardyń túr-túsin de, álgi aýylǵa barar joldy da bilemin dep otyr.