«Oralman» fılmi Irannyń Tegeran qalasynda sáýirdiń 21-i men 28-i aralyǵynda ótetin 35-shi Halyqaralyq Fadjr kınofestıvaliniń «Shyǵys panoramasy» baǵdarlamasyna qatysady, dep habarlaıdy Qamshy AA «Qazaqfılmniń» baspasóz qyzmetine silteme jasap.
Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Qadam» kınokomapanıasynyń qatysýymen túsirilgen «Oralman» fılmi atajurtynan ketýge májbúr bolyp, ondaǵan jyldar ótken soń Aýǵanystannan týǵan jerine qaıta oralǵan qandastarymyz jaıly. Rejıseri – Sábıt Qurmanbekov («Seker», «Jıde»). Fılmge Dýlyǵa Aqmolda, Esim Segizbaev, Erjan Túsipov, Shynar Asqarova, Baıan Qajnabıeva syndy qazaqstandyq tanymal akterler túsken.
«Oralman taqyryby ulttyq problemanyń eń úlkeni. Meniń aǵaıyndas baýyrlarym kezinde ekige bólinip, biri osynda qalyp, qalǵany Qytaı aýyp ketken. Olar altpysynshy jyldary qaıtyp kelgen. Alaıda Qytaıda týǵan baýyrlarymyzdy bótensı bastadyq. Bul tek qana meniń otbasymnyń emes barsha qazaqtyń basynan ótken. Bul bizdiń psıhologıamyzǵa ótpesteı iz qaldyrdy, bizdiń sanamyzǵa psıhologıalyq kirbeń keltirdi», – dedi fılmniń rejıseri Sábıt Qurmanbekov.
Fadjr halyqaralyq festıvali 1982 jyly Irannyń mádenıet mınıstrligi jáne ıslam baǵyty uıymymen negizi qalanǵan. Festıvál Qıyr Shyǵystaǵy eń aýqymdy ári tanymal kınofestıval esepteledi. Bul festıvál aıasynda álem kınematografısteri mádenı baılanys ornata alatyn birden bir alań.
Bıyl «Shyǵys Panoramasy» seksıasynda 12 elden 15 tolyqmetrajdy kartına usynylǵan. Otandyq kartınamen qatar bas júldege «Volá otsov» (Qyrǵyzstan), «Ýchenık» (Sıngapýr, Germanıa, Fransıa, Qytaı), «Dom drýgıh» (Grýzıa, Ispanıa, Horvatıa, Reseı), «Spreı» (Úndistan), «Seıatel» (Japonıa) jáne basqalar talasady.
Rejıser Sábıt Qurmanbekov fılm jaıly óz oıyn bildirip, festıválden ne kútetindigi týraly aıtyp berdi:
«Bul festıválden jeńis kútpeımin. Óıtkeni maǵan jeńis mańyzdy emes. Maǵan sol jaqtaǵy qandastarymyzdyń osy fılmdi kórgeni mańyzdy. Fılmim arqyly jalpy adamzattyq taqyrypty kótergim keldi. Oralmandar tek bizde emes evreı, nemis jáne basqa da halyqtarda bar. Bizdiń aýylda nemister kóp bolatyn. 90shy jyldary olar Germanıaǵa údere kóshti. Alaıda olar birden sol jerge sińisip ketken joq. Olar óz otanynyń mentalıtetine beıimdelýi qıyn bolady. Olar teńizdiń ortasynda qalyp qoıǵan aral sekildi bolyp qaldy...»
Aıta ketelik, Fadjr kınofestıvaliniń «Shyǵys Panoramasy» baǵdarlamasynda qazylar alqasy qatarynda tanymal rejıser Dárejan Ómirbaev bar. Dárejan Ómirbaev 2013 jyly atalmysh kınofestıvalge «Stýdent» atty fılmimen qatysqan bolatyn. Sondaı-aq, qazylar alqasy qatarynda: ırandyq kınorejısser jáne senarıst Kamal Tebrızı, túrik rejıseri Zekır Demırkýbýz, fransýzdyq prodúser jáne kınosynshy Nedjıb Aıed jáne ázerbaıjandyq rejıser Hamıda Omarova bar. Dárejan Ómirbaev qazylarmen Azıanyń úzdik rejıserin, úzdik qysqametrajdy jáne tolyqmetrajdy fılmin tańdaıtyn bolady.
Fılm HH ǵasyrdyń 30-shy jyldary qyzyl áskerdiń jendetterinen Aýǵanystanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.
