Qazaqstan Respýblıkasy Mádenıet jáne sport mınıstrliginiń tapsyrysy boıynsha «Qazaqfılm» kınostýdıasynda óndirilgen Asqar Uzabaevtyń «Jol» fılmi 2017 jyldyń 13-20 sáýir aralyǵynda Reseıde ótken  «Krasnogorskıı» halyqaralyq sporttyq kınofestıvaline qatysyp, «Úzdik sújet» nomınasıasy boıynsha jeńiske  jetti, dep habarlaıdy Qamshy aqparattyq agenttigi "Qazaqfılmniń" baspasóz qyzmetine silteme jasap.
 

Atalmysh fılm Qazaqstandaǵy eń áıgili sport túri – boks týraly baıandaıdy. Kartına erejesiz jekpe-jekke qatysatyn jas jigit týraly.

«Jol» fılminiń túsirilimi Almaty qalasynda ótti. Túsirilim jumystarynyń bir bóligi qaladaǵy «Baraholka» atalyp ketken bazarda túsirilse, jattyǵý jumystary beınelengen kórinister Qazaq ulttyq agrarlyq ýnıversıtetiniń sport zalynda ótti. Fılmdegi basty róldi «G.H.A.D» mýzykalyq tobynyń ánshisi, jas akter Nazar Sharhan somdaǵan. Al bas keıipkerdiń súıiktisiniń rólinde T.Júrgenov atyndaǵy Qazaq Ulttyq óner akademıasynyń túlegi Dınara Jumaǵalıeva oınaǵan. Al kartına barysyndaǵy eń jaǵymsyz keıipkerdiń beınesine QR Eńbek sińirgen artısi Dımash Ahımov («Sońǵy asý», «Prımıte Adama!»).  Sonymen qatar fılmde jattyqtyrýshynyń rólin - QR Eńbek sińirgen artısi Erik Joljaqsynov, Temirlannyń ákesiniń rólin – Erjan Túsipov («Siz kimsiz Ka myrza?») oınaıdy. 

2003-shi jyly qurylǵan «Krasnogorskıı» halyqaralyq festıvál - Shyǵys Eýropadaǵy jáne TMD elderindegi iri sporttyq kınobaıqaý. Kınofestıval prezıdenti – álemniń úsh dúrkin olımpıada chempıony, álemniń on dúrkin chempıony, on bir ret Eýropa chempıony – Irına Rodnına.

Bıylǵy jyly festıvál baǵdarlamasyna 100-ge jýyq sport týraly kınotýyndylar túsken. Festıválge qatysý úshin tańdap alynǵan 70-ke jýyq kórkem jáne derekti kınofılmder  15 elden usynylǵan.  Olardyń arasynda: Reseı, Avstrıa, Belarýs, Ulybrıtanıa, Germanıa, Ispanıa, Italıa, Qazaqstan, Kanada, Moldova jáne t.b.