Ótken aptada, qazannyń 9-y Astana qalasynda «Bir maqsat, bir múdde, bir bolashaq!» atty Halyqaralyq óner festıvali ótti. Festıválge qatysyp, júldegerler qatarynan kóringen jas aqyn Marǵulan Aqanmen órbigen «Qamshy» portalynyń eksklúzıvti suhbatyn nazarlaryńyzǵa usynamyz:
- Marǵulan júldeńmen quttyqtaımyn. Óner festıvali qalaı ótti?
- Rahmet. Bul jolǵy alamanǵa Qytaı, Mońǵolıa, Qyrǵyzstan, Ózbekstan, Tájikstan, Arabıa, Túrkıa, Germanıa, taǵy basqa Eýropa elderin, jıyny jıyrma elden 80 ónerpaz múshaıra, dástúrli án, sýret kórme baǵyty boıynsha qatysty. Olar on segiz ben otyz bestiń arasyndaǵy jastar. Sheteldegi qazaqtardyń óner festıváline toptasýy ulttyń uıysýynyń bir kórinisi edi. Uıymdastyrýshy QR Mádenıet jáne Sport Mınıstrligi, tilderdi damytý jáne qoǵamdyq-saıası jumys komıtetine kóp alǵys bildiremiz. Festıvál aıasynda Astananyń ásem jerlerin aralap, Ulttyq mýzeıdi tamashalaýǵa múmkindik aldyq. Óner básekesine ózge eldiń atynan qatysqan ónerpazdardyń basyp kópshiligi qazaqstanda turatyndar edi. Festıvál maqsaty sheteldegi qandastarymyzdyń tanylmaǵan talanttaryn halyqqa jarıalaý bolyp tabylady. Mońǵolıa respýblıkasynan kelgen Ózgeris atty baýyrymyz talaıdy tánti etti. Dástúrli ánniń bas júldesin jeńip alǵan bul jigit «Bas» daýysymen án aıtady eken. Ol bundaı daýysqa ıe Qazaqstan boıynsha úshinshi adam ǵana bolyp otyr. Ózgeristi bolashaqta úlken sahnadan kóremiz dep senemin. Buǵan deıin men qatysqan básekelerdiń ishinde meni tań qaldyrǵan da, eń ádil ótken de osy doda boldy. Poezıaǵa úsh júldeli oryn jáne eki yntalandyrý júldesi taǵaıyndalǵan. Dástúrli ánge tipti tóreshiler óz qaltalarynan teńge shyǵaryp júldeler sanyn arttyryp jatty.
- Siz qaısy eldiń atynan óner talastyrdyńyz? Festıválde baǵyńyzdy qandaı óleń ashty?
- Men Qytaı qazaqtarynyń atynan qatystym. Altaı aımaǵynyń Kóktoǵaı degen jerinde dúnıege kelgenmin. Bul jer tý kóterip, elin qorǵaý úshin tulpar mingen Ospan batyrdyń týǵan topyraǵy. Ákem de, men de Qytaıda dúnıege kelgenimizben arǵy alty atam Aıakózde týǵan. Atam toǵyz jasynda týǵan jerdiń topyraǵymen qoshtasyp shetel asypty, men toǵyz jasymda atajurtqa oraldym. Bulda bolsa ýaqyttyń toǵysýy dep oılaımyn. Festıvál sharty boıynsha, bizge Qazaqstan jaıynda bir óleń, atajurt týraly jáne erkin taqyrypqa bir óleń oqý tapsyryldy. Men óz kezegimde «shekaradaǵy sher» degen óleńimdi oqydym. Múshaıraǵa Nesipbek Aıtuly tórelik etti. Bas júldeni Qytaıdan kelgen Erkin Isahan aldy. Úshinshi oryndy qanjyǵama baılap qaıttym. Festıvál maǵan úlken shabyt syılady.
Áńgimelesken: Birlesbek Saıaúl
Marǵulan Aqan. Shekaradaǵy sher
Pań dala,
Dármen bershi paqyryńa,
Taǵdyrdyń salyp qoıma taqymyna.
Jaryq kún jaryǵyńmen jarylqa bir,
Mamyq tún jol kórsetshi aqynyńa.
Artqany jurttyń júgi jaýyryna,
Aqynmyn... Qarǵys aıtpas jaý ulyna.
Shekara, shekteı kórme sherimdi sen,
Jetkizshi Alataýdyń baýyryna!
Aparshy uly Abaıdyń aýylyna!
Kóńilim qulazyma marqaı desem,
Tur alda Arqa-ákem, Altaı-sheshem.
Bastaýdan zám-zámińdi kún týar ma,
Qaımyqpaı qanyp isher jarty aı kesem.
Jotańa kózim túsip tebirendi,
Ár alýan shashyratyp kók reńdi.
Aldyna qarap ulyń arman keship,
Artynda jurtqa qarap kúńirendi.
Kindigim jurtqa qaldy qanyn kómip,
Asyqtym! Qalmasyn dep arym da ólip.
Otanǵa otty jebe sekildenip,
Atyldym adyrnadan janymdy órip.
Dúnıe bilmeppin-aý tarlyǵyńdy.
Týǵan jer, tabalama taǵdyrymdy,
Kúsh bolsa taý-tasyńmen Tolaǵaıdaı,
Kóshirip áketer em barlyǵyńdy.
O,áke qarashy áne pań dalany,
Kórgen kóz sulýlyqqa tań qalady.
Rýhymyz ólmesinshi... anaý shapqan,
Tulpardan bizge jetken shań baǵaly.
Qaıǵyny - qýanyshty ultpen keship,
Oralý mańdaıyma bitken nesip.
Jetpegen jetegińe jurttyń jasy,
Keledi saǵan aýa bultpen kóship.
Shúkir-aq! Qudaı berdi qalaýymdy,
Tıgizdim jerge jyly tabanymdy.
Kósh jetip kerýenge úrgen qara kúshik,
Qarsy aldy tistep turyp balaǵymdy...
Tisteshi, tisteı tússhi sezineıin,
Talqysyp topyraqta kóz ileıin.
Atamyzdyń shekpenin jurtta qalǵan,
Bir ıiskep qushaǵyńda ezileıin.
