Qaısybir jyly Qarataý bókterindegi Taýkentke jolym túse qaldy. Mektebine bas suqtyq. Oqý isiniń meńgerýshisi symbatty, ashyq-jarqyn kelinshek eken. Mektepti aralatyp, jetistikterimen tanystyrdy. Taýkent túkpirde ornalassa da rasymen-aq, oqý ordasy Almaty mektepterinen esh kem emes. Lıngofondyq jáne mýltımedıalyq kabınetteri jap-jańa. Fransýzdar jasaqtap beripti. Tanystyrý barysynda álgi kelinshek maǵan jalt buryla qarap, aqsıa kúlimsiredi. Tanys ta beıtanys janar. Biraq jón surasyp turatyn ýaqyt joq. Kóp aıaldaǵan joqpyz. Arnaıy biz úshin jaıylǵan dastarhanǵa qaramastan, ýran totyǵyn óńdeıtin zaýyttarǵa tartyp kettik. Negizgi tapsyrmamyz da osy edi. - Tólegen Mombekovtyń "Saltanat" kúıin bilesiz be? - dedi bizge jol kórsetip júrgen serigimiz. - Álgi kelinshek sol Saltanat qoı! Áp-sátte men úshin aspan aınalyp jerge tústi! Kóz aldyma shashy qıylǵan, júzinen jyly kúlki ketpeıtin aq sary qyz kele qaldy. Ol kezde men 9-synypta oqıtynmyn. Jaz bolsa túp naǵashylarymnyń aýyly - Qozmoldaqqa tartyp ketýshi edim. Ermahan kókemniń úıi - Tólegen kúıshimen ıyqtas otyr. Kún saıyn keshkilik sol mańaıdyń jastary jıylyp, oıyn oınaımyz, áńgime-dúken quramyz. Janyna qurbysyn ertip, Saltanat ta kelip turady. Syrttaı bilýimshe, Saltanattyń ákesi belgili kúıshi. Anasy Saltanatqa tolǵaq ústinde dúnıeden ótipti. Tólegen kúıshi "Saltanat" kúıin jan-dúnıesi kúızelgen tusta dúnıege ákelipti. Shyǵarmanyń óne boıy lapyldaǵan sezim, ózekti órter ókinish, tyǵyryqta qylań bergen úmitten turady. Tyńdarmannyń alpys eki tamyryn ıitip, janarǵa eriksiz jas úıiredi. Kúıshi bul qaıǵyǵa da moıymady. Basyn tik kóterip, jastaı jetim qalǵan balalaryn jetildirýge umtyldy. Keıinnen, bir áıelge úılendi. Odan 2-3 balasy bar ekenin estigem. Tipti, kórip te júrdim. Birte-birte Saltanat ekeýimizdiń sózimiz jarasa bastady. Kún eńkeıse bolǵany, Ǵanı ekeýimiz Saltanattyń esiginiń aldyna jetemiz. Odan ary Raıgúldi ertip alyp, qarańǵy túskende eki-ekiden bólinip ketemiz. Júrekte bulqynǵan balalyq sezim aýzymdy býady. Kóp eshnárse aıta qoımaımyz. Ol kezde buıyǵy edik. Meniń baıqaǵanym - Saltanattyń janary óte syrshyl. İshtegi sezimin móldiregen kózderi jasyra almaıdy. Sol kózden uqqan sezimdi ǵana qanaǵat tutamyn. Al sóılegen kezde tek anasy jaıly tolǵanady. Jetimsiregen kóńil jubanysh izdeıdi. Men únsiz tyńdaımyn. Jazdyń qysqa túni tamyljyp tur. Qarataýdan esken salqyn samal ishtegi alaı-túleı sezimmen qosylyp deneni muzdatyp salady. Kemip, jaryǵy semip bara jatqan aıdyń ólimsiregen sáýlesi Saltanattyń betindegi qubylǵan sezimdi jasyra almaıdy. Shegirtkeniń shyryly, qoradaǵy qoıdyń kúısegen dybysy, anda-sanda áýp ete qalatyn mań tóbet túnektegi óli tynyshtyqqa jarasymdy jan bitiredi. - Meni izdep qaldy, - deıtin Saltanat, úı jaǵyna abdyraı qarap. - Kókem mensiz kóz ilmeıdi... Esik aldyna kelgesin taǵy da biraz únsiz turamyz. Álden soń, Saltanattyń janary jarq etip, betime qaraıdy da, tisteri aqsıǵan kúıi úıine júgire jóneledi...

Bul taǵdyrdyń sheberligin aıtsańshy! Araǵa biraz jyl salyp, qıandaǵy aýdannan qyz aldym. Saltanat ta dál sol aýylǵa kelin bolyp túsipti. Biraq jolyǵýdyń sáti túspedi. Birneshe jyl ótkesin, Saltanattyń Reseıge Kamaz aıdap ketken kúıeýiniń iz-túzsiz joǵalǵany jaıly jaısyz habar jetti. "Kebenek kıgen keledi" degen úmitpen, Saltanat 5-6 jyl taǵy kútti. Sońynda atasy men enesi kelinnen obal bolmasyn dep, batasyn berip, shyǵaryp salypty. "Saltanat tórkinine kóship ketti" dep taǵy bir estigem. "Anasynyń qursaǵynan aza tutyp týǵan qyzdyń taǵdyry taǵy da tálkekke tústi-aý" dep bir kúıindim. Aıanysh týdartyn sezim emes. Jáı, kúıik qana... "Saltanat kúıin bilesiz be?" degende selk etkenim de sodan edi. Meniń kóz aldymda eki Saltanat turdy: onyń biri balǵyn da beıkúná boıjetken bolsa, ekinshisi symbaty kelisken múldem ózge kelinshek edi. Al jastyq shaqtyń oralmas kúnderi 32 jyl buryn zý ete shyqqan. Endi qaıtadan Saltanatpen kezdesermin dep kim oılaǵan? Aqsıǵan qyzdyń kóńildegi beınesi áldeqashan kómeskilenip ketipti. Al onyń meni tanyǵany aqıqat...

(Facebook-tegi paraqshasynan)