Tósekte jatqan balanyń shashy túsip qalǵan, terisi jasyl túske engen. Ol buryshta nemeresine jyly shulyq toqyp otyrǵan egde jastaǵy eden jýýshy áıelge qarap «Ámına apa, men ólmeı-aq qoısam bola ma?» dep surady.
Bul suraqty estigen áıel tóbesine sýyq sýdy quıyp jibergendeı kúı keshti. Adam mundaıǵa eshqashan eti úırenbeıdi. Eshqashan...
«Janym-aý, o nedegeniń? Árıne ólmeısiń...» dedi áıel kózindegi jasty jasyrýǵa tyrysyp.
«Ámına apa, senbi kúni anamnyń týǵan kúni edi. Men oǵan óz qolymmen syılyq daıyndadym. Eger ólip qalsam qalaısha ony tartý etpekpin? Senbi kúni ólmesem bola ma? Bola ma?» dedi jalynyshty únmen bala.
Onkologıa. Ólim men ómirdiń arasyndaǵy syzyq sekildi. Onkologıalyq aýrýdyń jazylmaıtyn túrine shaldyqqan balalardyń sanaýly kúnderi qaldy. Biri bir apta ómir súrse, ekinshisi bir aıdan keıin o dúnıelik bolýy múmkin.
Oǵan eshteńe kerek emes. Ol tek anasynyń týǵan kúnine deıin úzilip ketpeýdi armandaıdy. Túrli-tústi qaǵazdan jasaǵan syılyǵyn tartý etip, anasynyń júzinen qýanyshty kórgisi keledi. Onyń ómirindegi eń qymbat syılyq...Sońǵy syılyq...
2016 jyly 36 myńnan astam qazaqstandyq onkologıalyq aýrýǵa shaldyqqan. Jyl saıyn qaterli dertten 13 myń adam kóz jumady. Soltústik pen Shyǵys Qazaqstanda qaterli isikten kóz jumatyndardyń sany kóp.
Baılyq pen mansap ýaqytsha, qýanysh pen qıynshylyq ótkinshi. Tek adamnyń artynan qaldyratyn sara joly, asyl mırasy máńgilik.
Bolmashy máselege bola ómirden túńilip, ómirden baz keship jatatynymyz jasyryn emes. Alaıda jaqyn adamdaryńnyń aman-esen júrýiniń ózi ómirdegi eń úlken baqyt ekenin túsine bermeımiz. Keıde kesh túsinemiz.
Daıyndaǵan: Ásem Álmuhanbet
