Tabysqa jetken erkektiń artynda bir myqty áıel turady. Irlandyq boksshy Konor MakGregordiń búgingi sáttiliginiń tarıhy sonyń naq dáleli. Ol bir ýaqytta eki márte chempıon atanyp, búgingi tańda mıllıondardyń kózaıymy bola bildi. Óziniń tarıhı jeńisinen keıin Konor suhbatynda súıgen jaryna alǵysyn bildirdi: «Eger meniń súıiktim bolmaǵanda, búgingi jetistikterimniń biri de bolmas edi».

2016 jyldyń qarashasynda Konor MakGregor jeńil skalmaqtaǵy chempıon Eddı Alvaresti jeńgen soń UFC tarıhynda bir ýaqytta eki dúrkin chempıon atandy. Bul onyń ómirindegi zor jeńis boldy. Sol kezdiń ózinde Konor tilshilerge bergen suhbatynda óziniń jeńisi tek oǵan emes, súıgen qyzy Dı Devlınge de tıesili ekenin aıtqan. Dı Devlın árdaıym sportshynyń janynda bolǵan, ony qoldap, tireýi bola bildi, Konor seniminen aıyrylǵan kúnniń ózinde Dı oǵan sendi.

«Meniń túgim bolmaǵan kezder bolǵan. Tas kedeı edim, biraq súıikti qyzym árdaıym meniń janymda boldy, ol meni tastaǵan emes. Al búgin ol úshin bárin isteı alatynyma maqtanamyn. Onyń qalaǵanyn alyp bere alamyn, onymen birge álemdi sharlasam da bolady jáne bulardyń bárin men qýana-qýana isteımin».

Dı men Konor 2008 jyly tanysqan. Qyz jigitke bir kórgennen ǵashyq bolypty. «Ol adamnyń kóńilin kótere alady. Kóńil kúıim bolmaı turǵannyń ózinde onyń janynda eriksiz kúletinmin. Biz tanysqan sátte ol jattyǵý zalyna baryp júretin, maǵan onyń sportqa degen mahabbaty, qaıtpas qaısarlyǵy qatty unady», deıdi boksshynyń súıiktisi.

Ekeýiniń kezdeısoq tanystyǵy 10 jylǵa sozylyp kelgen úlken mahabbatqa ulasty. Jigit qyzdy alǵash kórgende-aq, «dál osy qyz meniń jaqyn dosym, qorǵaýshym, qoldaýshym bolady» dep oılaǵan.  

«Men ár kún saıyn óz maqsatyma qadam bastym, ár kúnim daıyndyqpen ótetin. Al Dı árdaıym meniń janymda boldy, meniń armandarymdy tyńdady, aqylyn aıtty. Ol – meniń qorǵaýshym. Eger Dı bolmaǵanda, men de bolmas edim. Onsyz dál qazir qandaı kúıde bolatynymdy tipti elestete almaımyn», deıdi Konor.

Dı Konordyń ár jeńisin maqtanyshpen qabyldady, er azamatyn qashan da bıikte ustady. Eń bastysy, ol súıgen adamynyń sáttiligine sendi. Árdaıym qamqorlyq tanytyp júrdi, ásirese qalaı tamaqatanatynyna erekshe kóńil bóletin, sebebi kez-kelgen sportshy úshin durys tamaqtaný – mańyzdy.

Chempıonnyń janynda bolý árkimniń qolynan keletin is, al óz serigine múltiksiz senim artý, jeńilgen jaǵdaıdyń ózinde qoldaý kórsetý – ekiniń biriniń qolynan kele bermes.

Búginde Konorda bári bar, Dı ekeýi kez-kelgen ýaqytta álemdi sharlap kete alady.

«Meniń Dıge degen alǵysym sheksiz. Ol men úshin ystyqqa da, sýyqqa da tózdi. Endigi kezek meniki. Onyń qalaǵanyn istep, barynsha aıalap ustaý – meniń mindetim. O soǵan laıyq». 

Sholýshy: Gúlim Jaqan