Búgin «Nur Otan» partıasynyń Ortalyq apparatynda partıa Tóraǵasy Birinshi orynbasarynyń jetekshiligimen «2016-2019 jyldarǵa arnalǵan «Densaýlyq» memlekettik baǵdarlamasynyń iske asyrylýy týraly» partıalyq tyńdaýlar ótti.

Atalǵan baǵdarlamany júzege asyrý arqyly 2021 jylǵa qaraı qazaqstandyqtardyń ómir súrý uzaqtyǵyn 73 jasqa deıin kóterý, al ólim deńgeıin 10 paıyzǵa tómendetý kózdelgen. Bul mindetterdiń barlyǵy 2016 jyldan bastap júzege asyryla bastaǵan «Densaýlyq» memlekettik baǵdarlamasyna engizilgenin de atap ótken jón. Osyǵan oraı atqarylǵan jumystar jaıynda Densaýlyq saqtaý mınıstri Eljan Birtanov baıandama jasady.

«Memlekettik baǵdarlamany júzege asyrýdyń 2016 jylǵy aldyn ala qorytyndysy boıynsha negizgi kórsetkishter kóńil qýantady. Máselen ómir súrý uzaqtyǵy, halyq densaýlyǵynyń ındeksi, turǵyndardyń melısınalyq kómek sapasyna qanaǵat deńgeıi boıynsha oń ózgerister baıqalady», – dedi E.Birtanov.

Qazirgi tańda baǵdarlamany júzege asyrý barysynda 34 kórsetkishtiń 30-dan astamy oryndalǵan. İs-shara barysynda Parlament Májilisiniń depýtaty, «Nur Otan» partıasy saılaýaldy baǵdarlamasynyń «Densaýlyq saqtaý» baǵyty boıynsha kýratory Záýresh Amanjolova men Áleýmettik medısınalyq saqtandyrý qorynyń tóraıymy Elena Bahmýtova baıandama jasap, atqarylǵan jumystar jaıynda naqty derekter keltirdi.

Otyrysqa qatysqan Májilis depýtattary, «Nur Otan» partıasy fraksıasynyń músheleri atalǵan salaǵa qatysty mınıstrge saýaldaryn joldady.

«Birinshi baılyq – densaýlyq» degen halqymyz onyń adam ómiri úshin eń mańyzdy ekenin jaqsy bilgen. Sol sebepti elimizde densaýlyq saqtaý isiniń mańyzy eshqashan tómendegen joq. Onyń ústine Qazaqstannyń eń damyǵan 30 eldiń qataryna qosylýdy maqsat tutyp otyrǵanyn eskersek, atalǵan salanyń qyzmet sapasyn arttyrý, adam ómirin saqtaý sıaqty ózekti máseleler kún tártibinde ózdiginen aldyńǵy orynǵa shyǵady. Sondyqtan «Nur Otan» partıasynyń osy salaǵa aıryqsha den qoıyp, Memleket basshysy tapsyrǵan bastamalardyń júzege asyrylýyn qatań qadaǵalaýy kóńil qýantady.