Keıde kútpegen kezdesýler adamnyń ómirin 360 gradýsqa ózgertýi múmkin. Den esimdi qartaıǵan er adamnyń oqıǵasy soǵan dálel.

Tara Výd esimdi Feısbýk qoldanýshysy basynan ótken áserli oqıǵa jaıynda oqyrmanymen bólisti. 40 jastaǵy jazýshy áıel kúıeýimen 7 balany ósirip otyr. Birneshe kún buryn onyń Nora esimdi qyzy 4 jasqa toldy.

Týǵan kúnine bir kún qalǵanda anasy men qyzy egde jastaǵy er adammen tanysyp, oǵan qamqor bolýdy sheshedi. Jáne bul sheshimdi nebári 4-tegi qyz qabyldaǵan. Anasy qyzynyń aqyl-oıynyń damyp úlgergenine ishteı maqtanady.

Bul jaıynda Tara «Ata-ananyń bir kúni» tobyna jazdy: «Qyzymnyń týǵan kúnine bir kún qalǵanda bizdiń aramyzda keremet áńgime boldy. Qyzym qart adamdardy jaqsy kóretinin aıtty, sebebi olardyń terisi jumsaq, aqyryn qozǵalady, ólimge bir taban jaqyn bolady, sol úshin olardy barynsha jaqsy kórip, qamqorlyq tanytý kerektigin qyzym jaqsy biledi».

Týǵan kúnine oraı Nora anasymen dúken aralaýǵa shyǵady. Anasy biraz ýaqytqa ǵana basqa jaqqa burylyp qalǵan. Keıin qyzyna qarasa, Noranyń belgisiz qart adamǵa qolyn bulǵap turǵanyn kóredi.

«Sálem, qarıa! Búgin meniń týǵan kúnim», dep aıqaı saldy. Tara qyzynyń qylyǵyna uıalyp ketedi.

Álgi qart adamnyń janyna baryp keshirim suraı bergende er adamnyń istegen isi áıeldi qaıran qaldyrdy.

«Sálem, kishkentaı hanshaıym! Iá, neshege toldyń?» dedi qarıa qyzdyń janyna baryp. Ekeýiniń áńgimesi tipti jarasyp-aq ketti. Ata qyzdy týǵan kúnimen quttyqtap, qoshtasyp kete bardy.

Qyz bunymen toqtaǵan joq. Jańadan tanysqan atasymen sýretke túskisi keldi. Buǵan qarıa qýana kelisti. Qoshtasarda Nora qarıanyń ájim basqan qoldaryn ıiskep, súıip aldy. Áıel adam onyń atyn suraǵanda, Den dep jaýap berdi.

Keterinde qarıa ózin bir sátke baqytqa bólegen Noraǵa alǵysyn jaýdyrdy.

Bul oqıǵany Tara birden Feısbýkke jazady. Bul jazbasyna jaýap retinde bir áıelden hat keledi. Hatta Denniń áıeli birneshe aı buryn qaıtys bolǵany, búginde qarıanyń qatty jalǵyzsyrap júrgeni jazylǵan. Hatty oqyǵan Tara qarıanyń nómirin surastyryp, oǵan habarlasýdy jón kórdi.

«Biz Den myrzanyń qarapaıym ǵana úıine keldik. Úıdiń ár buryshy onyń qaıtys bolǵan áıelin eske salady. Qarıa bárin daıyndap qoıǵan. Tipti Noraǵa arnap kishkentaı ústel men sýret salýǵa arnalǵan qarandash-paraqtary da daıyn. Keıin Noranyń salǵan sýretin óziniń tońazytqyshyna ilip qoıdy», dep jazdy Tara.

Den myrza kóp sóılegish Noranyń ár sózin jalyqpastan muqıat tyńdady. Anasy men qyzy qart adamnyń úıinde 3 saǵattaı boldy.

Búginde Nora Den myrzanyń jaǵdaıyn jıi surap turady. Ol da jańa tanysqan dosyn eshqashan umytqan emes. Er adam áıeli ólgen soń ómirinde birinshi ret jany jaı tapqanyn aıtady.

«Bul eki adamnyń jas aıyrmashylyǵy – 70 jyl. Alaıda bir-birin múldem tanymaǵan eki adam aıyrylmastaı dostarǵa aınaldy», deıdi Tara.

Sholýshy: Gúlim Jaqan