Jýyrda «Qamshy» agenttigi saıtynan AQSH ta turatyn 101 jastaǵy Ásıa Sardarbekqyzynyń ómirimen tanystym. Meniń keıipkerim Danabek qartpen taǵdyrlas jan eken. Bul óleńimdi jazǵanda, ata jurtymyz Qazaqstanǵa jete almaı shermende bolyp shette júrgen kezimiz edi. Ózimdi aıta almaı,  Nú-Iorktegi keıipkerim arqyly saǵynyshymdy jetkizgemin. Mine sondaı bir apa aldymnan shyǵyp tur.

Osy jyly Dúnıejúzi qazaqtarynyń 5-quryltaıy Astanada ótedi. Álemdegi barsha qazaqtyń bir ǵana otany bar. Ol-Qazaqstan!

«Ósıet» atty bul ballada 1992 jyly jazylyp, 1993 jylǵy «Altaı aıasy» jýrnalynyń 1-sanynda jaryq kórip edi. 2006 jyly Almatyda basylyp shyqqan «Kúnásiz meken» jınaǵymnyń 122 betinde tur(kitap.kz  portalynan oqı alasyzdar).  Ótken kúnde belgi bar dep, jarıalap otyrmyn.

ÓSIET

Amerıka qalasynda Nú-Iork,

Kúnin sándi ótkizetin kúndelik.

Mılıarder Danabek qart eń sońǵy,

Ósıetin bylaı depti kúrmelip...

-Jasaý bar da, ólý degen túbi shyn,

Óli keter, jalǵastyrar tiri isin.

Ósıetimdi aıtaıynshy, aqyrǵy,

Kóp keshikpeı tıylady tynysym.

Jarda súıdim, óstim, óndim bala kóp,

Qalany da qyzyqtadym qala dep.

Jerdiń mynaý, arǵy-bergi betterin,

Aralaǵan men edimǵoı Danabek!..

Sol Danabek, sor men baqty teń keshken,

Shamshyraǵym qaıta janbas endi óshken.

Ketirmeýge erlik etkem esemdi,

 Kúshtimen de kúnim úshin beldeskem.

Janalqymda jalǵyz ǵana jan qaıǵy,

Jaǵalaspaı baqytyńda janbaıdy.

Ólim kútseń, órge umtylmaı ólez bop,

Urpaǵyńdy tirlikte kim jalǵaıdy!..

Jetegimen osynaý bir qıaldyń,

Bul ómirdi bir kisideı súıe  aldym.

Týǵan jerdi tunjyratyp eriksiz,

Erteń úshin, sender úshin qıa aldym.

Jumysymda adamdar bar neshe myń,

Baılyq mynaý, bilgim de joq, esebin.

O, ǵalamat búgin janym qysyldy,

Tarlyq etti ózime óz tósegim...

Tarlyq etti mynaý saraı, mynaý baq,

Kóńil búgin osylardan tym aýlaq.

Tirligimniń kúzi bitip osy sát,

Qysy tústi túngi aspan qylaýlap.

Qaıran meniń, týǵan jerim, baıyrǵy,

Jaýyzdar-aı, eńiretip aıyrdy.

Aspanymdy ot qamshylar tilgilep,

Shańyraqty shart etkizip Jaı  urdy.

Jalpaq dala qońyrsydy Jaı túsken,

Alystyq-aý, atqylastyq, aıtyspen.

Qorshaýynda antalaǵan ajaldyń,

Qutylýdy bilmeı júrdik qaı tuspen...

Týǵan jerge sımaı qashqan pendemiz,

Ondaı kúndi kórme ulym, kórme qyz.

Taǵdyr búgin sılaǵanmen yrǵyndyq,

Týǵan jerdiń Quzyrynan kendemiz.

Týǵan jer-aı, saǵyndyrdy tunyǵym,

Ańsaýmenen ketti meniń tynymym.

Kóz aldymda qumǵa sińdi sol tamshy,

Atqan oqtan tesilgende tulybym.

Kóz aldymda jasyl orman, ózenim,

Óziń desem, órtenedi ózegim.

Armysyńdar, ańsadym-aý, ańsadym,

Kóre almaıtyn boldym seni, óz elim!..

Balalarym, kelinderim, nemerem,

Yrazymyn bunyń qalaı demegen.

Túsinińder, bilińdershi janymdy,

Eńireımin «Týǵan jer!» dep, nege men?

Úrkitpese, bolar edik, bospaǵan,

Demes edik jylap turyp «Qosh dalam!».

Bir kózden jas, bir kózden qan sorǵalap,

Ózen bolyp sorǵalady qos taram...

Jipke tizip ne qylaıyn ótkendi,

Kóp keshikpeı kóripti elim kóktemdi.

Shyndyq qaıta shyǵandapty shyr alyp,

Sur jylannyń surqıasy shekteldi.

 Baquldasyp men ketemin aradan,

Alystaımyn arman bolǵan bar adam...

Umytpańdar, uly meken shalǵaıda,

Babań týyp, baıtaq jerge taraǵan!

Men ólgen de suranyńdar eki Elden,

Súıegimdi kóshirińder, shetelden!

Týǵan jerdiń topyraǵyna qoıyńdar,

Boryshtaryń bolar sonda ótelgen.

Meniń elim jer sharynyń arjaǵy,

Kóz aldymda sondaı anyq bár-bári.

Týǵan jerdiń topyraǵyna bólený,-

Qarttaryńnyń, júrektegi armany.

Ete almadym týǵan jerge mol eńbek,

Kim oılaǵan, Nú-Iorkte ólem dep...

Aq sút bergen týǵan jer-aı, qaryzyń,

Qaıtip qana, qaıtip qana tólenbek!

Ulyń seniń jat enege telindi,

Tek ózińe tóge almadym terimdi.

Óziń úshin tulpar minip, tý ustap,

Aq kóbikke shylanbady tebingi.

Ómir, netken qas-qaǵymdaı keltesiń,

Kórsin Rýhym týǵan jerdiń ór tósin.

Kóktemin de gúlge oranyp qabirim,

Al, jamylsyn, qysta áppaq kórpesin.

Bul aranyń qushaǵyna bermeńder,

Uqsaı bermes, uqsaı bermes jer men jer.

Meniń mynaý, bir ýystaı denemdi,

Jer uıyǵym, JEMENEI-ge jerleńder!..

At sýǵarǵam qolyma ustap shylbyryn,

Dál osydan naq qyryq bes jyl buryn.

Jemeneıdiń jaǵasyna kómińder,

Máńgi estip jataıynshy, syńǵyryn!..

-dep, Danabek kózin jumdy sońǵy ret,

Basyn ıip, jylady jurt «sóndi» dep.

Týǵan jer dep, týǵan El dep kóz jumǵan,

Netken ystyq, netken adal sol júrek!!!

(DB, Qulja)