Mahabbat ólkesin sharlap, ishki sezimniń názik ıirimderin sezinýge májbúrlegen «Qyz Jibek» qoıylymy kórermenin bir marqaıtty.
13 maýsymda M.Áýezov atyndaǵy Qazaq Memlekettik akademıalyq drama teatrynda Ǵ.Músirepovtiń «Qyz Jibek» mýzykalyq dramasynyń premerasy ótti, dep jazady Qamshy aqparattyq agenttigi.
Qazaqtyń lıro-epostyq jaýhar jyry «Qyz Jibek» mahabbat gımni dese bolady. Osy epos negizge alynǵan bul týyndyǵa da Qyz Jibek pen Tólegenniń júrek terbirenter qaıǵyly mahabbaty arqaý bolǵan. Oqıǵalar negizinen jaǵalbaıly rýynan shyqqan batyr Tólegen, shekti rýynyń sulýy Jibek jáne el arasynda erjúrektigimen, kúsh-qaıratymen aty shyqqan batyr Bekejan arasyndaǵy qarym-qatynastar tóńireginde órbıdi de, aqyry Tólegen qyzǵanyshtyń qurbany bolady. Súıgeninsiz Jibekke de ómir joq... El birligi men tutastyǵy ıdeıasy qatar órilip, halyqtyń oı-armany men ańsary tanylatyn, boıaýy jarqyn qoıylymda ulttyń ómiri men tyǵyz baılanysty dástúrler de - bata sóz, qarǵys, joqtaý, zar, kóńil aıtý, qoshtasý jáne t.b. – jaqsy kórinis tapqan.
Jibektiń batyldyǵy men adaldyǵy, Bekejannyń satqyndyǵy, Tólegenniń batyrlyǵy – bári halyqtyń kóńil kózine ottaı basylyp, kórermen rýhanı lázzat alyp, bir marqaıyp qaldy.
Qoıylymnyń qoıýshy-rejısseri – Elbasy qory syılyǵynyń laýreaty E. Nursultan.
«Qyz Jibek» mýzykalyq dramasynda tanymal juldyzdar S.Baqaeva, A.Shaıahmetov, E.Daıyrov, A.Kırkabakov,M.Taǵanov, Sh.Asqarova, Sh.Janysbekova, G.Týtova,B.Turys, B.Ábdilmanov, S.Merekeuly, J.Tolǵanbaı,Z.Karmenova, D.Úsenova, J.Janyamanova, K.Shaıahmetova, J.Maqajanova, A.Jumabaev, J.Tınbaev, A.Baqytjanova syndy basqa da kóptegen teatr artıseri óner kórsetti.
Sondaı-aq, qoıylym el ómirindegi mańyzdy shara «Ekspo-2017» Halyqaralyq mamandandyrylǵan kórmesi aıasyndaǵy M.Áýezov atyndaǵy Qazaq Memlekettik akademıalyq drama teatrynyń Astana qalasyndaǵy gastróldik saparynda 23 maýsym kúni saǵ.19-00de Astana Jastar teatrynyń sahnasynda álem jurtshylyǵynyń nazaryna usynylmaq.
Aıta keteıik, búgin ıaǵnı,14 maýsymda teatrdyń 91-maýsymynyń jabylý saltanaty ótedi.
Gúlim Jaqan
