Kúnniń kúrt jylynýynan jaýyn-shashyn azaıyp, onsyz da ylǵalǵa zárý qazaq dalasyn qýańshylyq jaılaýy múmkin, dep jazady Qamshy aqparattyq agenttigi. Otandyq klımatologtar aldaǵy 50 jylǵa osyndaı boljam jasap otyr. Bul týraly KTK arnasy habarlaıdy.

Oǵan sebep - aýa-raıyndaǵy ózgerister. Buryn sıklon batystan-shyǵysqa qaraı yǵysatyn bolsa, qazir ońtústikten ystyq lep kóbirek soǵatyn bolypty. Al temperatýra 1 jarym gradýsqa kóterilgen. Sońǵy kezderi jıilep ketken sý tasqyny men sel, dúleı jel sonyń saldary eken. Qazgıdromettegiler naǵyz ózgerister áli alda dep otyr. Óıtkeni, 30-40 jyldan keıin kún taǵy ysı túsip, al osy ǵasyrdyń sońyna qaraı birqatar ózen-kólder Aral teńiziniń taǵdyryn qaıtalaýy múmkin. Qýańshylyqtan qashyp qutyla almaımyz, degenmen ol prosesti kesheýildetýge bolady eken.

-Parnıkti gazdardy azaıtý kerek. Biz qazir atmosferaǵa tastap jatqan parnıkti gazdardyń mólsherin jyldan jylǵa azaıtyp, sol kezde temperatýranyń qarqyndy ósýi tómendeıdi, - deıdi «Qazgıdromet» RMM ǵylymı zertteý ortalyǵynyń dırektory Paıyzhan Qojahmetov.