Qazaqstandyq ánshi Dımash Qudaıbergenniń Astanada 27 maýsymda ótetin "Bastaý" atty jeke konsertine keletin sheteldik juldyzdardyń esimderi belgili boldy, - dep habarlaıdy Qamshy aqparattyq agenttigi Tengrinews.kz –ke silteme jasap.
Bul týraly oryndaýshynyń PR-dırektory Alpamys Sharımov málim etti. Onyń aıtýynsha, keletin qonaqtarynyń ishinde Qytaı elinen Terrı Lın bar. "Qytaı eliniń eń jaryq juldyzy. I Am Singer jobasynda Dımashqa qarsylas bola júrip, qamqorlyǵyn tanytyp, Qytaı eliniń juldyzdarynyń ishinde dostyq nıetin tanytqan alǵashqy ánshilerdiń biri. Dımashtyń týǵan kúninde jeke konserttik kıimin syıǵa tartyp, arnaıy tilegin de bildirdi. Tipti, Dımash Terrı Lındi "qytaılyq ókil ákem" dep atap ta ketti. Kóp márte azıalyq marapattardyń júldegeri Terrı Lın 27 maýsym #Bastau-dyń qurmetti qonaǵy!", - deıdi Sharımov.
Taǵy bir tanymal juldyz - shvesıalyq ánshi Loreen (@loreenofficial - Shvesıa). Ol - "Evrovıdenıe 2012" jyldyń jeńimpazy, dans-pop, evrodens janrynda án shyrqaıtyn tanymal Eýropa ánshisi. "Atyshýly Warner Music leıblymen seriktestikte qyzmet atqaratyn Lorınniń 2012 jylǵy "Heal" álbomy Evropanyń barlyq án sherýlerinde top jardy. Evropanyń sálemin bizge Dımashtyń án keshinde Lorın jetkizetin bolady!", - dep tanystyrdy ánshiniń ókili. Qazaqstandyq ánshiniń konsertine Ulybrıtanıadan Elıt-Bekstor Sofı (@sophieellisbextor) keledi. Ol - 1997 jyldan beri shyǵarmashylyǵymen aınalysyp kele jatqan álemniń tanymal ánshisi. Kóptegen tanymal ánderdiń avtory, kompozıtor. "Tanymal sán brendteriniń jarnamasy. Onyń ánimen súımeldep, al sulý beınesi jarnamanyń ózine aınaldy! Elıs-Bekstor Sofı Qazaqstanda alǵash ret Dımashtyń jeke án keshinde qonaqqa keledi!", - deıdi Alpamys Sharımov. Qonaqtardyń qatarynda kórshi eldiń ystyq sálemimen "Reseı Federasıasynyń Eńbek sińirgen ártisi", "Top Hit awards" marapatynyń júldegeri Krıstına Orbakaıte Dımashtyń konsertine arnaıy kele jatyr. "Slaván bazarynda" Dımashqa jeńis syılaǵan ánderdiń biri "Opát metel" áni Krıstına men Dımashtyń dýetinde qalaı shyrqalady eken?! 27 maýsym birge tamashalaıtyn bolamyz", - deıdi ánshiniń PR-dırektory.
Al otandyq óner ıelerinen Qazaqstan Respýblıkasynyń eńbek sińirgen ártisi, Memlekettik syılyqtyń laýreaty. Parıjdegi "Grand Operada" Qazaqstannyń atynan óner kórsetken tuńǵysh ári ázirge jalǵyz opera ánshisi Maıra Muhamedqyzy (@mairaopera) qatysady. "Dımash qashanda qoldaý kórsetip júretin Maıra Muxamedqyzy #Bastau-keshiniń qurmetti qonaǵy!", - dedi Sharımov. Al Dımash Qudaıbergenniń ózi keshine keletin árbir qonaqtyń - eldiń qonaǵy ekenin aıtyp, sheteldikterdi dostyq nıetpen qarsy alýǵa shaqyrdy.
"Meniń #AstanaArena-da ótetin #Bastau keshime az kún qaldy! Shyǵarmashylyǵymdy qoldap, bata berýge asyqqan myńdaǵan kórermenime rızamyn! Shoý konsert aldynda etıka boıynsha qurmetti qonaq bolyp qatysqaly jatqan ánshilerdi tanystyrýǵa ruqsat etińizder! Ár meniń keshime kelgen qonaq - Elimizdiń qonaǵy, Sizdiń úıge kelgen qonaq dep qabyl alyńyz! Shyn júrekpen, dostyq nıetpen qarsy alaıyq!", - dep jazdy Dımash Qudaıbergen. Aıta keteıik, Dımash Qudaıbergen 27 maýsymda 20:00-de Astanadaǵy "Astana Arenada" jeke konsertin ótkizedi.
Sholýshy: Aıgerim Taýbaı
