El ordasy Astanada ınjenerler men ǵalymdardyń dúnıejúzilik kongresi bastaldy, dep habarlaıdy Qamshy aqparattyq agenttigi 24.kz-ke silteme jasap.

 EHRO kórmesi aıasynda ótetin 2 kúndik sharaǵa álemniń 50 elinen sheteldik 300 ǵalym Astanaǵa arnaıy at basyn buryp otyr. Tanymal tulǵalar qatarynda Nobel syılyǵynyń laýrettary da bar.

WSEC – ınjenerler men ǵalymdardyń dúnıejúzilik kongresi. Iaǵnı qazirgi ǵylym salasyndaǵy kil myqtylar bas qosatyn jıyn. Al kongrestiń bıylǵy taqyryby – Bolashaqtyń energıasy: ınovasıalyq senarıler men ony iske asyrýdyń tásilderi. Mundaı taqyryptyń tańdalýy beker emes.

 Óıtkeni kongres EXPO kórmesi aıasynda ótkeli otyr. Basqosýda energetıka salasyndaǵy eń úzdik jetistikter men zamanaýı baǵyttar talqylanatyn bolady. Taraptar elektr qýatyn óndirýde qorshaǵan ortaǵa keri áserin tıgizbeıtin tyń tehnologıalarǵa basymdyq bermek. Aıtyp ótkenimizdeı, kongres EXPO kórmesi aıasynda josparlanǵan eń aýqymdy sharalardyń biri sanalady. Halyqaralyq kórmede kórsetiletin ınovasıalyq týyndylar men zamanaýı ǵylym ókilderiniń bir jerde toǵysýy sınergetıkalyq nátıje bereri sózsiz.

Aıta keteıik, bul kongres Ortalyq Azıa elderi arasynda alǵash ret ótkeli tur. Tórtkúl dúnıeniń tórt buryshyndaǵy 50-den astam elden bir myń qatysýshy Astanaǵa keldi. Olardyń deni sheteldik ǵalymdar ekenin atap ótken jón. Mártebeli meımandar qatarynda Nobel syılyǵynyń tórt laýreaty, «Jahandyq energıa» halyqaralyq syılyǵynyń segiz laýreaty, tanymal qazaqstandyq jáne sheteldik ekologtar, sarapshylar bar. Bul rette Kýba ǵylym akademıasynyń vıse-prezıdenti Fıdel Kastro Dıas-Balart qazirdiń ózinen Kongres jumysyna úlken senim artyp otyrǵanyn uıymdastyrýshylardan estidik. 

Sholýshy: Aıgerim Taýbaı