Bir momyn ózi orazaly eken, jumysynan shyǵyp, keshkisin úıine qaraı asyǵady ǵoı. Jolaı eki dosy ushyrasa ketedi. Olardyń da aýyzy bekitýli eken. Sodan dostaryna úıge júrińizder dep aıtyp qalady.
- Búgingi aýyzashar menen bolsyn dostarym. Senderdi kórmegeli kóp boldy. Kelińder, kólikke otyryńdar, - dep shaqyrdy.
- Bolsa, bolsyn. Al bardyq shaqyryp turǵan soń, "Shaqyrǵan jerden qalma" degen, - dep eki dosy shaqyrýyn qosh alady. Azdan soń bir qıylysta jáne tanystary jolyǵady. Kórisken soń olardy tastap ketýge bolmaı qalady. Ózderiniń kóligi bar. Aýyzasharǵa túrik kafesine shyqqan boılary eken. "Ony qaıtesińder, bizben birge júrińder!" deıdi ǵoı bular. Sóıtip on adam munyń úıine kele jatyr shaqyrǵan soń. Endi bul oılap keledi. "Eki dosym jaraıdy. Al olardyń da joldastaryn jolda qosyp alǵanym qyzyq boldy-aý ózi?! Úıde azyq-túlik te joq edi ǵoı. Qara sý men qatqan nan bolsa bolar... Áıelim qazir ne kúıge túser eken?.." - dep ishteı qatty qapa bolady. Sodan bir ońtaıly tusta kóligin toqtatyp, ońashalanyp telefon shalady. Qyrsyqqanda qońyraýy jetpeıdi. Qaıta-qaıta shaldy. Birligi de bitken eken. Bary "maıaktaýǵa" jetti áıteýir. Biraq áıelinen sybys bolmady. Úıi qalanyń shetinde bolatyn. Jetkenshe biraz ýaqyt alady. Ol aınalasyndaǵylarǵa syr bermeýge tyrysty. Kóligin jaımen aıdap keledi. Artynda taǵy bir kólik. Sodan óziniń oılanbaı istelgen áreketine ishteı kúıip úıine de bir top qonaqpen saý etip kirip keledi. Tabaldyryqtan attaǵanda-aq muryndaryna dámdi astyń ıisi burqyraı jetip, aýyzashar ýaqytynyń taıaǵanyn sezdirip-aq jatyr. Qonaq bólmege engen orazaly meımandar alýan dám toly mol dastarhandy kórip, ózderin aýyzasharǵa shaqyrǵan úı ıesi men onyń qoly sheber jubaıyna rıza bolyp jatyr. Bári qurmamen, sýmen aýyz ashyp, biletinderi aqsham namazyn oqyp, qaıta dastarhan mańynan tabylyp, bir-birin saǵynysqan týystardaı emen-jarqyn kúıde tamaqtanady. Alýan jemis pen qarbyz-qaýynǵa sheıin meımandostyqtyń shyraıyn ashqan bul dastarhannyń ortaımaýyna, úı ıeleriniń baqytty bola berýlerine bata-tilegin arnaǵan qonaqtardy shyǵaryp salǵannan keıin kúıeýi shydaı almaı áıelin qushaqtap, betinen súıdi.
- Jaryq kúnim-aý, men saǵan eskertpesten úıge bir qaýym qonaq ilestirip keldim. Úıde tamaqtyń joǵyn, ony ala qoıatyn qarajatymyzdyń da túgesilip qalǵanyn bilemin ǵoı. Biraq nege ekenin qaıdam, basynda tek eki dosymdy shaqyrǵam, jolshybaı olardyń dostary kezdesip, sodan osylaı bop qaldy. Alaıda sen bizdi arnaıy ázirlikpen qarsy aldyń ǵoı. Osynshama rızyq qaıdan paıda boldy?!
- Sen "SMS" jazyp jiberipsiń ǵoı. "Janymda on adamym bar, aýyzasharǵa daıyn bol"dep. Sodan men sasqalaqtap qaldym. Sol sátte ózim kir jýyp jatqan edim. Seniń áne bir kópten kımeı ilgishte qalǵan kóne djınsovyı jıdeńniń qaltasyn aınaldyryp jatqanymda ishinen shıyrshyqtalǵan edáýir aqsha shyqty. Sý tıgenmen jyrtylmaǵan. Seniń umytshaqtyǵyńa kúlip alsam da, eshkimge qaryz bolmaı óz aqshamyz ózimizge olja bolǵanyna qýanyp, birden iske kiristim. Saǵan qaıtara telefon shalýǵa da mursham bolmaı qaldy ǵoı. Dymqyl tartqan aqshany útkipen keptirip, dúkenge shaptym. Úlgerdim. Aqsha da týra jetti. Tıyn-teben qaldy da,-dep kúlimsiredi súıikti jar odan saıyn súıkimdilenip.
- E, qyzyq eken. Ondaı umytshaq emes edim...
- Iá, umytshaq emessiń! Talaı ret kıimderińniń qaltasynan 200-dik teńge shyǵatyn edi ǵoı, bul joly kádimgideı! Eger ol aqsha bolmaǵanda, onda bilmeımin ne qylarymdy. Qara sý qoıatyn bolarmyn ár qonaqtyń aldyna...-dep zaıyby jymıyp, erine erkeleı qarady. Eri bolsa óziniń umytshaqtyǵynyń da bir paıdasy tıgenine áli qaıran. Sosyn áıeliniń telefonyn alyp, kelgen hatty ashyp oqydy, onda: "Sizge ****** myna nómir on ret telefon shaldy" degen jazý ǵana tur eken. Erli-zaıyptylar bir-birine qarap kúlimdep, úıdiń ishin meıirim shýaǵyna bóledi.
-"On qaıtara telefon shaldy" degendi seniń qalaı oqyǵanyńdy bilmeımin, biraq týra túsingenińe óte rızamyn, janym! Al men álgi aqshany osy kún úshin umytqanmyn ǵo shamasy. Solaı buıyrmys, qyzyq,-dep eri jaryn qushaqtap, mańdaıynan ıiskedi. Súıikti jary da erkeleı ún qatyp, syńǵyrlaı kúlip, azamatyn uıatqa qaldyrmaǵanyna shúkirshilik etip jatty. Osy sátterde baqytty shańyraqtyń tóbesinde san myń juldyzdar jymyńdap, perishteler Allaǵa madaq ánin shyrqap jatty. Meshitte taraýyh úni terbelip, dúnıe nurǵa shomǵan. Jaratqan Alla ózine táýekel etken qulyn jalǵyz tastamaıdy ǵoı! Bul erli-zaıyptylar kúnde Allany aýyzdarynan tastamaýshy edi..."Qudaısyz qýraı basy synbaıdy" dep otyrýshy edi biz biletin baıaǵynyń sary tisti kempir-shaldary, sol ras...
Munaıdar Balmolda
